Man getuig in George-streekhof oor vriendin se noodlottige beserings in 2022

Update

GEORGE NUUS - Die man wat daarvan beskuldig word dat hy in Maart 2022 sy vriendin, Andresia Alaart (30), se dood veroorsaak het, het vandeesweek met sy getuienis in die George-streekhof begin.

Warren Appels (50) staan tereg op 'n aanklag van manslag. Die saak is Maandag 31 Augustus uitgestel tot Vrydag 18 September, wanneer Alaart se ma, Christa Alaart, na verwagting sal getuig.

Appels is op Saterdag 26 Maart 2022 op die toneel in Llamastraat, Delvillepark, in hegtenis geneem.

Alaart se liggaam is op 'n matras in die leefarea van Appels se ouerhuis gevind. 'n Nadoodse ondersoek het bevestig dat haar dood veroorsaak is deur houe met 'n stomp voorwerp teen haar kop.

Volgens Eric Ntabazalila van die Nasionale Vervolgingsgesag het die paartjie 'n geskiedenis van huishoudelike geweld gehad en het argumente gereeld ná alkoholgebruik ontstaan.

Volgens Appels se weergawe het hy en Alaart baklei en het hy haar tydens die voorval met 'n voorwerp teen haar kop geslaan. Hy beweer dat hy haar die volgende oggend dood aangetref het.

Appels het sy verklaring aan die hof voorgelees en onder meer gesê dat "Satan die skuldige is".

Volgens sy weergawe was Alaart kwaad oor 'n ander vrou, wat hy as 'n 'lady of the night' beskryf het. Hy het aan die hof gesê dit was nooit sy bedoeling om haar dood te maak nie.

Vorige artikels: