GEORGE NUUSFLITS & VIDEO - Die veld en woud agter Plantasieweg in Heatherlands onder die berg smeul steeds na hewige brande gister gedreig het om verskeie wonings langs die groen strook te verswelg.
Brandweermanne moes bont staan om die vlamme weg te hou. Digte rook hang steeds oor die woonbuurt, maar volgens die brandweer is alles in die gebied onder beheer.
In Myrtleweg het 'n huis se dak gebrand en altwee die heinings en vier palmbome by dié huis is in die vuur verswelg. By 'n huis in Erikaweg het 'n palm ook soos 'n fakkel gebrand, maar die brandweer kon daarin slaag om die vlamme te blus. Drie brandslange is ingespan om die brandende boom te blus. Die vlamme het ook aan die huis begin lek-lek, maar gelukkig het die wind bedaar en is die huis gered.
Lientjie Saayman van die Heatherlands buurtwag se huis is baie naby aan die woud gelee en sy het vanoggend aan die George Herald gesê dat hulle gister talle benoude oomblikke beleef het, maar dat die brandweer hulle uitstekend van hulle taak gekwyt het.
“Toe ons hoor dat ‘n boom in Erikastraat brand het ek baie groot geskrik, want ons is baie nader aan die bos en veld waar dit gebrand het. Ons het gelukkig nie skade nie, maar dit sal ‘n tyd vat om van die rookreuk ontslae te raak.”
Saayman se kleuterdogter, Jessica, is in ‘n skooltjie in die gebied en ouers het gejaag om hulle kinders te gaan haal in geval rook en vlamme die skooltjie sou oorval.
Sy is ‘n aktiewe lid van die buurtwag en sê mense was wonderlik. “Inwoners het broodjies en water vir die brandslaners gegee en deur middel van ons Whats App groep is almal op hoogte van verwikkelinge gehou.”
Kyk na 'n video-onderhoud met Saayman, hieronder:
Klik hier vir vorige artikels:
- Fires in and around George under control
- Vuur woed steeds in dele van George
- Update: George fires
- Update: Houses on fire
- Firemen battle George fires
- Inwoners vlug terwyl brande woed
Die vuur het baie naby aan die huise gekom.
Die rook hang vanoggend steeds in Heatherlands.
ARTIKEL, FOTO'S EN VIDEO: ILSE SCHOONRAAD, GEORGE HERALD-REKDAKTEUR.
'Ons bring jou die nuutste George, Tuinroete nuus'
