Singrew-moord: Man en neef skuldig bevind

Update

GEORGE NUUS - Die uitspraak in die saak waarin die 47-jarige Duanne Singrew en sy neef, Heinrich Jumat (46), aangekla is van die moord op Singrew se vrou, Joan (53), is vanoggend, Donderdag 19 Maart, in die rondgaande hooggeregshof in George gelewer.

Albei is skuldig bevind aan moord met voorbedagte rade, asook dwarsboming van die gereg. Vonnisoplegging sal op Dinsdag 7 April plaasvind.

Singrew het aanvanklik op agt aanklagte tereggestaan, waaronder aanranding met die doel om ernstig te beseer, gewone aanranding, huishoudelike geweld, roof met verswarende omstandighede, ontvoering, moord en dwarsboming van die gereg. Sy neef is saam met hom op die laasgenoemde vier aanklagte aangekla.

Beide beskuldigdes het vroeër onskuldig gepleit en aangevoer dat hulle valslik vir die misdaad opgestel is.

In sy uitspraak het regter André le Grange gesê dat die Staat se saak hoofsaaklik op omstandigheidsgetuienis berus het. Hy het egter bevind dat die Staat se getuies geloofwaardig was en dat hul weergawes ooreengestem het. Die Staat het ook sterk gesteun op forensiese getuienis en videobewyse.

Le Grange het Singrew se getuienis beskryf as deurtrek met teenstrydighede en bevind dat Joan se dood die gevolg was van ’n gewelddadige fisiese aanranding wat op verwurging uitgeloop het. Daarna het Singrew en Jumat haar liggaam sonder enige waardigheid in ’n kloof in Groot-Brakrivier gestort.

Le Grange het bevind dat die Staat sy saak bo redelike twyfel bewys het en dat die getuienis in geheel oorweldigend teen die beskuldigdes getel het.

Joan is op 21 November 2024 vermoor. Haar liggaam is enkele dae later, op 25 November, wat haar 54ste verjaarsdag sou wees, in ’n beboste gebied naby Charlesstraat in Groot-Brakrivier gevind.

Beeldmateriaal van 21 November, die dag van Singrew se verdwyning, wys ’n wit Ford Figo buite die oorledene se woning in Rosemoor, omstreeks 10:36. Later dieselfde dag was die voertuig op pad na die gebied waar haar liggaam gevind is, en daarna weer op pad terug, voordat dit in die rigting van die N2 vertrek het.

’n Bloedspatselkenner en forensiese ontleder van die polisie het getuig dat bloedspore, moontlik van ou of skoongemaakte bloed, in die Singrew-woning sowel as in die Ford Figo gevind is.

Die staatsaanklaer, adv. Evadne Kortje, het in haar slotbetoë aangevoer dat Jumat waarskynlik in die voertuig voor die woning gewag het terwyl ’n konfrontasie tussen Singrew en die oorledene binne die huis plaasgevind het, waartydens sy vermoor is.

Daarna is die voertuig na bewering na die agterkant van die huis verskuif, waar die liggaam uit die woning verwyder en in die kattebak gelaai is.

Hoewel die Staat erken het dat die moord moontlik in die hitte van die oomblik plaasgevind het, is daar betoog dat die beskuldigdes se optrede op voorbedagte rade gedui het. Volgens die Staat het Singrew geweet dat die oorledene van plan was om ’n klag teen hom by die polisie in te dien, en dat hy doelbewus opgetree het om dit te verhoed.

Jumat het verkies om nie te getuig nie.

Previous articles: