Update Video

GEORGE NUUS EN VIDEO - Die polisie is steeds op soek na verdagtes ná die liggaam van 'n Ethiopiese man, Zinabu Keshamo (30), Dinsdagoggend 9 Maart in sy huiswinkel in Rosemoor gevind is.

Toe George Herald kort na die voorval op die toneel aankom, was forensiese deskundiges en Conville-speurders, onder leiding van stasiebevelvoerder kol. AB Kriga, besig om die toneel in Woltemadestraat te fynkam vir leidrade.

Volgens Suid-Kaapse polisiewoordvoerder, kapt. Malcolm Pojie, is die oorledene Dinsdagoggend in sy winkel aangetref na die gemeenskap onraad vermoed het.

"Die polisie is tussen 08:00 en 09:00 deur bure na die toneel ontbied omdat die winkel nie soos gewoonlik oop was vir besigheid nie," het Pojie gesê.

Die oorledene is die laaste keer op Sondagaand, 7 Maart omstreeks 21:15, lewend gesien toe hy na bewering by sy vriendin in Eden Park gekuier het.

Die oorledene se lyk word deur forensiese patologie uit die winkel gedra. 

By aankoms op die toneel het mede-Ethiopiërs en familie van die oorledenes die slot aan die buitekant van die deur oopgebreek sodat die polisie toegang tot die perseel kon verkry.

"Toe hulle die winkel binnegegaan, het lede die liggaam van die oorledene ontdek met 'n wond aan die agterkant van sy kop. 'n Lykskouing sal gedoen word om die presiese oorsaak van sy dood vas te stel, "sê Pojie.

Kyk 'n video hieronder:

Teen druktyd Woensdagoggend is nog geen verdagtes in hegtenis geneem nie.

Eden-klusterbevelvoerder, generaal-majoor Oswald Reddy, het 'n beroep gedoen op enigiemand met inligting wat die polisie kan help om die skuldige(s) vas te trek. 

Die ondersoekbeampte, sers. Johannes Neff, kan by 044 803 3301, 063 487 1515 gekontak word. Inligting kan aan Stop Misdaad by 08600 10111 deurgegee word.

Alle inligting sal vertroulik hanteer word.