GEORGE NUUS - Dit was 'n harde slag vir die Heunis-familie toe Frans Heunis van Wildernesshoogte skielik op 5 Februarie in die ouderdom van 81 oorlede is nadat hy het met die bakterium Vibrio vulnificus in aanraking gekom het.
'n Gedenkdiens is deur ds. Human Coetzee in 'n volgepakte George Gereformeerde Kerk op Woensdag 10 Februarie gehou.
Frans het 16 jaar gelede na sy familie se plaas, Kaaimanskop, in Wildernesshoogte teruggekeer, waar hy en sy vrou, Corlia, 'n aktiewe afgetrede lewe gelei het.
"Dit was 'n lewenstylkeuse en nie soseer om te boer nie," het sy dogters verlede week vertel. Die plaashuis kyk uit oor die Map of Africa aan die noordekant en op die see aan die suidekant.
Op hierdie plaas is Frans op 24 Augustus 1934 gebore. Hy het sy onderwysdiploma aan die Oudtshoorn Onderwyskollege behaal.
Daarna het hy jare lank in KwaZulu-Natal onderwys gegee. Hy is bevorder na departementshoof in Eshowe, nadat hy sy meestersgraad aan die Universiteit van Suid-Afrika (Unisa) in Afrikaans behaal het.
Hy was altyd 'n uiters flukse man, en het tot sy dood die tuin bygehou en was aktief besig met allerhande take. Frans en Corlia het uitgesien na hul 57ste huweliksherdenking, maar helaas was dit hulle nie beskore nie.
Corlia is voorsitter van die George-leeskring. Afgesien van sy vrou, word Frans oorleef deur sy drie dogters, drie skoonseuns, ses kleinkinders en een agterkleinkind.
Die Heunis-gesin het almal bedank vir hul ondersteuning.
Klik hier vir verwante artikels:
- Frans Heunis 'in wrong place at wrong time'
- Kaaimans River: Initial bacteria tests negative
- Update: Kaaimans River bacteria
- Don't swim in estuaries with open wounds
- Kaaimans River opened
- Kaaimans River closed
ARTIKEL: PAULINE LOURENS, GEORGE HERALD-JOERNALIS
'Ons bring jou die nuutste George, Tuinroete nuus'
