NASIONALE NUUS - ‘n Vreemde, Afrikaanse man wat lappe om sy lyf bind en mantras prewel, het onlangs ‘n Boeddhiste-sentrum in Pretoria-Moot geopen, maar die inwoners het hom nog nie met fakkels bestorm nie.
Sy mantra is: liefde. Net liefde.
Dit is laatoggend in Waverley in Pretoria-Moot waar die inwoners van Breyerlaan nog self hul gras sny. Saterdae na ‘n Blou Bulle-wedstryd op hul platskerms kyk en Sondae in die kerk sit. Die meeste inwoners is so Afrikaans soos boerewors en melktert.
Maar ‘n vreemde ding het vroeg Januarie hier gebeur: ‘n Ding wat die dominee by die NG kerk Waverley, net om die hoek, versigtig is om met sy gemeentelede te bespreek en wat een van die buurvroue nuuskierig oor haar muur laat loer en kopskuddend “vreemd-vreemd” mompel.
‘n Boeddhistiese-sentrum, die Jang Chup Chopel Centre (sentrum van lig), het vanuit een van die woonhuise verrys en toe hulle weer hoor het die 108 Boeddhistiese-mantras uit die mond van Duan Pienaar (48) begin stroom.
Nog voor sy nuuskierige buurvrou en sy ateïstiese buurman (aan die linkerkant) hulle oë kon uitvee het Afrikaners (mans en vroue) na die sentrum begin gaan om te leer mediteer en hul innerlike self te vind.
“Daar is ‘n Boeddha in elkeen van ons,” sê Pienaar.
