GEORGE NUUS - George-rugbyklub se eerstespan het sy segetog voortgesit toe hy Thistles verlede Saterdag op Outeniquapark oortuigend met 55-20 geklop het.
Die 'Bloutrein' het aanvanklik gesukkel om aan die gang te kom en heelwat drieë het weens hanteringsfoute verlore gegaan. Die voorspelers het in die skrums en lynstane uitgeblink.
Leandre Meyer (stut) het 'n paar goeie lopies ingekry en van Thistles se manne lelik met die grond laat kennis maak. Die flanke, Chris Kruger en Jerome Claassen, het, veral op die verdediging, verwoesting gesaai. Logan Vorster (agtsteman en kaptein) het ten volle herstel van sy besering en het met sy kraglopies uitgetroon.
George se drieë is deur Brandon Solomons (heelagter), Darren Hayward (skrumskakel), Leon Swart (slot), Gershwin Rhode (vleuel) Vorster (2) gedruk. Nathan Scott (losskakel) het met 5 doelskoppe en 5 strafskoppe geslaag vir 'n totaal van 25 punte. Sy taktiese skopwerk het sy teenstanders op die agtervoet gehou.
Agterlangs het Brandon Solomons (heelagter), Adrian Maduna (vleuel) en Ruan Barnard (senter) ook uitgeblink
Die speler van die wedstryd was Brandon Solomons wat die beste agterlynspeler was en Leandre Meyer (stut) die beste voorspeler.
George se tweedes het Thistles met 38-15 afgestof en altesame ses drieë gedruk. Thistles kon net twee keer gaan druk.
Nathan Church (senter; 2), Johan Willemse (senter), Anton Muller (vleuel), Wilfed Natilanganiso (flank; 2) het vir George gedruk.
Nathan Church (senter) was die beste agterlynspeler en Wilfed Natilanganiso (flank) die beste voorspeler.
'Ons bring jou die nuutste George, Tuinroete nuus'
