SUID-KAAP NUUS - 'n Taai stryd wag Saterdagmiddag op die Parkdene-sportterrein in George wanneer die verdedigende Premierliga-rugbykampioen, Evergreens van Pacaltsdorp, en Crusaders die stryd aanknoop.
Evergreens, wat die seisoen in Cell C se Gemeenskapsbeker-kompetisie gespeel en met Worcester Villagers en Wanderers afgereken het, behoort die gunsteling te wees om die knoop deur te hak.
"Dat dit 'n tawwe kompetisie gaan wees, is gewis. Groot-Brakrivier en Progress is besig om hul staal te wys en met die nuweling, NMMU, ook in die kompetisie kan niemand op hul louere rus nie.
"Ons sal die kompetisie met die nodige toewyding aanpak en glo ons sal daar wees met die uitspeelwedstryde op Saterdag 26 September. Ons beskik oor ongelooflike diepte in verskeie posisies en dit sal definitief ons strewe wees om weer die Groot Uitdaagbeker op 3 Oktober op Outeniquapark omhoog te hou," het Mirco Geduld, hoofafrigter van Evergreens, aan die George Herald gesê.
Evergreens se bul-agttal met Dean Hopp (vaskopstut), Xavier Scholtz (haker), die slotte Alrico Beukes en Marvin November en die lostrio van Isaac Treurnicht, Llewellyn Treurnicht en Gershwin Muller aan die spits, kan die tuisspan op die agtervoet dwing.
Hul skerpskutter-losskakel, Leegan Moos, kan die wedstryd met sy skoen dikteer. Evergreens se agterste driehoek, hul vleuels, Joseph Fortuin en Luzanne Williams, en Deroy Rhode (heelagter) beskik oor baie spoed en kan baljaar as hul genoeg balbesit kry.
Crusaders sal baie steun op hul sterk binnesenter Lorenzo de Villiers, Rico Afrika (linkervleuel), Herald le Jander (losskakel), Haywin Jansen (flank) en Fabian Joseph (loskopstut).
Die vonke kan spat op Groot-Brakrivier waar die voorloper in die kompetisie die gedugte span van Progress die stryd aansê. Albei spanne is nog onoorwonne die seisoen en die span wat sy kanse die beste benut behoort die knoop deur te hak.
Aanskoulike hardlooprugby word op Saasveld tussen die NMMU en Uniondale verwag.
Ruaan Barnard (heelagter), Lenesteyo Nomdoe (linkervleuel), Dundre Maritz (buitesenter), Christian Willemse (losskakel) en die lostrio, Francois Kemp, Zandre Bekker en Tatquin de Jong, is goed op dreef vir die studente en kan vir Uniondale hoofbrekens gee.
NMMU t Uniondale; Silver Stars t Bridgton; Mosselbaai t Barbarians; Groot-Brakrivier t Progress; Crusaders t Evergreens.
Die jongste puntestand in volgorde gespeel gewen, gelykop, verloor, bonuspunte en punte is:
- Spanne S W G V BP P
- Groot-Brakrivier 2 2 0 0 2 10
- Progress 2 2 0 0 1 9
- Barbarians 2 1 0 `1 2 6
- NMMU 1 1 0 0 1 5
- Mosselbaai 2 1 0 1 1 5
- Bridgton 1 1 0 0 0 4
- Crusaders 2 0 0 2 1 1
- Silver Stars 1 0 0 1 0 0
- Uniondale 2 0 0 2 0 0
Artikel: André Stander
'Ons bring jou die nuutste Tuinroete, Klein-Karoo nuus'
