SUID-KAAP NUUS - Die afgelope naweek het Rebel-viertrekklub hul jaarlikse byeenkoms by Groot Brak se gruisgroef aangebied.

Dié gruisgroef met sy steil opdraandes en bedrieglike los klippies bly 'n gewilde baan wat bestuurders en navigators deurentyd uitdaag. Die SWD Extreme 4x4-klub, met talle lede uit Stilbaai en Oudtshoorn, het ook deelgeneem en saam met Rebel vir talle aksiebelaaide oomblikke gesorg. Veral die laaste hindernis was 'n tydtoets en die bestuurders moes hul voertuie so vinnig as moontlik, in lae bestek, deur 'n hindernis, wat kort draaie en modderpoele ingesluit het, jaag.

Michael Vermaak en Wayne Barkhuysen het in hul pypkar saam met die C- en CM-klas voertuie dieselfde baan aangedurf. In die CM-klas het die manne die pap dik aangemaak en bestuursvernuf het uiteindelik die wenner hier bepaal, Danie Smith en Japie van der Merwe was 'n kortkop voor Samuel Stander en Henrico Erasmus met Johan Vogel en Jacques Koen wat in hul nekke geblaas het.

Die C-klas voertuie, lang- en kortas-basisse, het ook dieselfde baan gery. Hier moes die manne en vroue mooi kophou en hul standaardvoertuie is behoorlik getoets, veral teen die steil opdraandes. En dit is waar dié voertuie met die luukse van 'n ewenaarslot die oorhand gehad het.

In die langas-basis het Johan Steenkamp en Elzette vir Jaco Kriel en André Beneke geklop. In die kortas-basis het Juan en Lientjie van der Merwe breed geglimlag met Koos la Grange en Ronel Strydom nie ver agter nie, Lindi Grobler en Mandy Lucas het self die manne opgedreun.

Die CL- en BM-klasse het saam deelgeneem en hier is man en masjien behoorlik teen die gruisgroef se steil walle getoets. Arjan Wierenga en Jacques Innes was bobaas in die CL- klas met Dwayne Erasmus en Wicus Leeuwner nie ver agter nie.
Met die punte van Ron Homan en Marius Barnard gelyk met dié van Francois du Toit en Cassie Carstens, het die tydtoets die deurslag gegee. Homan se tyd van 20,09 sekondes was die vinnigste en het aan hom die derde plek besorg.

In die BM-klas is Fanie Grobler en Etienne Jacobs jr. deur Walter van der Merwe en Paul du Toit gejaag met Christie de Kock en Gys van Vuuren kort agter hulle. De Kock het die rol van die dag-medalje huis toe geneem.

Dwayne Erasmus het die breek van die dag-medalje ingepalm nadat hy sy stukkende ewenaar met kleeflint moes heg.
Die volgende viertrekbyeenkoms is by die Aalwynfees op 14 Junie. Vir enige navrae bel vir Etienne Jacobs sr. op 082 558 7037 of Francois du Toit op 081 362 85256.

FOTOGALERY

'Ons bring jou die nuutste Tuinroete, Klein-Karoo nuus'

Read more about: viertrekkers 4x4 gruisgroef groot brak