Robin bou mooi wêreld sonder sig

Video

GEORGE NUUS EN VIDEO - Het jy al ooit gewonder hoe 'n persoon wat blind is die wêreld ervaar en hoe hulle die uitdagings van die lewe die hoof bied? In die lig van Loslitdag, op 1 September, het George Herald besoek gebring aan 'n inspirerende jong man van Parkdene, Robin Mouton (24).

Hy is by die APD (Association for the Physically Disabled) in Pacaltsdorp, waar hy sedert 2016 klasloop.

'n Mens sou dink dat Robin, wat blind gebore is, in 'n wêreld van onsekerheid en donkerte leef, maar dit is beslis nie die geval nie.

Terwyl ons die wêreld deur sig waarneem, het Robin die vermoë ontwikkel om op sy ander sintuie staat te maak - gehoor, reuk, gevoel en smaak, en hy doen dit met groot selfvertroue.

Hy het grootgeword met liefdevolle ouers, Alberto en Zuna, wat goed vir hom gesorg het. Hy het ook 'n jonger broer en suster, Urthen en Alexis, wat hom behandel asof hy nie blind is nie. Sy ma is drie jaar gelede oorlede, maar hy sê sy gawe stiefma, Fozia, sit soggens sy klere vir hom uit, en die uitrustings is kolskoot want hy kry gereeld komplimente van die skoner geslag.

Robin was as kind by Pionierskool vir Blindes in Worcester. Hy het 'n groot liefde vir Kaapstad waar hy gereeld saam met familie en vriende kuier. Hy vertel opgewonde van sy besoek aan Tafelberg waar hy met die kabelkar gery het.

Deur sy verhaal kan 'n mens die geluide van die kabelkar, die koue wind en die opwindende sensasie van opstyg byna eerstehands ervaar.

Sy gehoorsintuig is skerp ontwikkel, en hy kan fyn onderskei tussen geluide.

Hy gebruik dit om 'n denkbeeldige prentjie van mense om hom te vorm en hulle te herken aan hul unieke stemme of selfs hul manier van loop.

Robin maak ook baie staat op sy tassintuig. Deur fisieke aanraking kan hy 'n sterk indruk van mense kry en 'n band met hulle vorm.

Gevra oor die gebruik van 'n gidshond, vertel Robin dat hy nie een gebruik nie weens persoonlike voorkeure en vrees.

Hy deel dat hy groot drome het vir sy toekoms en dat hy passievol is oor musiek en veral lief is vir radio. Op sy gunstelingradiostasie, Good Hope FM, luister hy gereeld na sy geliefde DJ, Dr Jules. Hy hoop om hom persoonlik te ontmoet voor die jaar verby is. "Ek was ook al by HeartbeatFM en EDENfm in die ateljee en dit was 'n wonderlike ervaring," vertel hy.

Hoewel liefde nog nie sy pad gekruis het nie, het Robin 'n helder idee van wat hy soek in 'n toekomstige lewensmaat: 'n Sagte stem en 'n oop persoonlikheid is van sy vereistes.

Op 'n vraag oor die uitdagings wat hy as blinde ervaar, brei Robin nie veel uit nie, maar noem dat daar in alles iets positief is.

Robin Mouton

Volgens Sarida Felix van APD spreek hy gereeld leerders by skole toe om hulle te inspireer met sy optimistiese lewensuitkyk.

Iets wat hom wel pla en groot ongemak veroorsaak is wanneer mense na hom staar of hom "oppiep" weens sy blindheid. Hy verlang eenvoudig na normale, onvervormde interaksies.

Hoewel hy tans nie hulpmiddels soos slimfone gebruik nie, sou hy graag een wou hê. Dit is 'n eenvoudige wens wat sy daaglikse lewe kan vergemaklik en hom kan help om nog meer doeltreffend met die wêreld om hom te verbind.