GEORGE NUUS - Die brand wat sedert Maandagmiddag in Waboomskraal teen die Outeniquaberge woed is wel onder beheer, maar dit brand steeds in die bergagtige gebiede.
Dit is onduidelik presies hoeveel hektaar grond in die slag gebly het, maar etlike boere se plase was geraak deur die brand.
Kilometers draadheining het in die slag gebly, en heelwat natuurlike denne wat deur boere aan saagmeule verkoop kan word. Een boer het wingerdskade opgedoen, terwyl 'n kwekery twee plastiek tonnels kwyt is nadat die brand dit verwoes het.
Volgens Frans Venter, ‘n boer, kan dit sowat R10 000 tot R15 000 kos om ‘n kilometer se draadheining te vervang, na gelang van die skade wat dit opgedoen het. “In die aande sien ‘n mens die brand soos bloedstrepe teen die agterkant van die berg,” het hy aan die George Herald gesê. Venter reken dat die flink optrede van die Werk met Vuur-brandbestryders van Mosselbaai en Sedgefield gekeer het dat hy groter skade op sy plaas het.
Dean Barnard, ook ‘n boer in Waboomskraal, het vandag bevestig dat die boere deurentyd agter die brandweer gehelp het om die brand te bestry. “Ons [die boere] het nie self voorbrande gemaak nie, net gehelp om hout na binne te gooi en gesorg dat die gebrande gedeeltes nie weer opvlam nie,” het hy gesê.
Hansie Goetze, die eienaar van die kwekery, het skade van sowat R60 000 gehad nadat die brand twee van sy tonnels verwoes het. “Die boorgat se kragkabel en boks het ook gebrand,” het hy gesê. “Dit kon egter baie erger gewees het. Die boere in die Paardebond-omgewing het groot skade gely. Die een boer Cornél Fourie het nou geen voer meer oor vir sy beeste nie.”
Dié brand, wat in die Gamkwaberge uitgebreek het, het miljoene rande se skade veroorsaak.
ARTIKEL: MICHELLE PIENAAR, GEORGE HERALD-JOERNALIS
'Ons bring jou die nuutste George, Tuinroete nuus'
