SWELLENDAM NUUS - Duisende korrektiewe beamptes, familie, senior regeringsamptenare uit ander departemente en lede van die gemeenskap het eers die roudiens Dinsdag, 12 Mei en daarna die massa begrafnisdiens Saterdag, 16 Mei bygewoon vir die lede van Buffeljagsrivier Korrektiewe Dienste.
Bunit Brand, Frederick Carstens, Joseph Klaase, Dawid Arries, Sydwill Johnson, Ronzio Merrington, Nicolaas Jansen en Josephine Gertze het hul lewens verloor toe 'n vragmotor eers agter teen 'n bakkie, wat vir aankomende verkeer gewag het om na die oorkant van die pad te gaan, gebots het en toe teen die minibus van die Departement van Korrektiewe Dienste (DKD) wat hul na Buffeljagsrivier vervoer het om vir diens aan te meld. Jansen, Johnson, Klaase, Merrington en Gertze is tydens 'n roerende begrafnis ter ruste gelê.
Carstens en Brand is reeds Woensdag, 13 Mei begrawe en Arries is Vrydag, 15 Mei begrawe. 'n Groot markiestent en ander tente is by die plaaslike skougronde op die sportveld opgeslaan en meer as 5 000 mense het hul laaste eer gaan betoon.
Die begrafnis is gesamentlik deur die DKD en Swellendam-munisipaliteit gereël.
Michael Masutha (minister: Justisie en Korrektiewe dienste), Donald Grant (Wes-Kaapse mi-nister: Vervoer en Openbare Werke), Nicholas Myburgh (burgemeester: Swellendam) en Cecil Africa (munisipale bestuurder: Swellendam) was onder die teenwoordiges. In sy huldeblyk het Masutha die lede geprys vir die sterk bande en kameraderie wat daar tussen hulle heers en benadruk dat dit die gevolg is van die gevaarlike en eensame natuur van die werk wat hulle op daaglikse basis verrig.
"Ons betoon vandag eer aan die agt beamptes wat bygedra het dat Buffeljagsrivier Korrektiewe Dienste in al die sleutelareas van regering en DKD vereistes as een van die beste gereken word met geen ontsnappings, bedrog of korrupsie en 'n skoon verslag van die ouditeur-generaal," het hy gesê.
"Dit is nie slegs die familielede wat 'n groot slag met die ontydige dood van hul geliefdes toegedien word nie, maar ook die korrektiewe dienste omdat die personeelkorps van 60 beamptes met 13% verminder is."
Die ses beamptes is te ruste gelê in die plaaslike begraafplaas, met die klank van trompette met The Golden Streets of Jerusalem terwyl die kiste afsak en hul treurende geliefdes wat toekyk.
'n Hartroerende toneel by die begrafnisdiens.
Klik hier vir vorige artikels:
- N2 gru-ongeluk:Massabegrafnis vir slagoffers
- N2 gru-ongeluk: Trokbestuurder in aanhouding
- N2 gru-ongeluk:Trokbestuurder bly in aanhouding
- Eagles pay their respects to accident victims
- 8 sterf in gru-ongeluk naby Swellendam
Die families van Dawid Arries en Bunet Brandt tydens die roudiens. Foto: Independent Media/Tracey Adams.
ARTIKEL: WILMA ADAMSON, SUID-KAAP FORUM REDAKTEUR.
'Ons bring jou die nuutste Hessequa nuus'
