GEORGE NUUS - Om blind te word is om te ervaar hoe die donkerte jou stadig maar seker toevou, soos om jou kop onder 'n kombers in te steek, maar vir Hester van Deventer is dit haar lewe.
Sy het so twintig jaar gelede een oggend opgestaan en was blind in haar linkeroog.
Dokters het haar sig probeer red met 'n operasie, maar dit het net 'n tydjie gehou en toe word sy heeltemal blind. Haar regteroog se sig het mettertyd verswak omdat sy baie op dit staatgemaak het.
Vandag het sy 2,5% visie in haar regteroog, en Uska haar gidshond doen die res. Hulle het in Februarie hul liefdesverhouding begin, na hulle by 'n skool vir blindes in Johannesburg aan mekaar voorgestel is.
Johan van Deventer, Hester se man van die afgelope 40 jaar, sê dit is absoluut wonderlik om die band tussen Hester en Uska te sien. "Jy kan die spesiale band sien en van hul ontmoeting af was die twee versot op mekaar."
Hester vertel hoe 'n besoek aan die George-hospitaal moeilik kon wees sonder haar oë, maar Uska is sonder enige kyke toegelaat. Sy vertel hoe 'n instrukteur twee weke met haar en Uska spandeer het en oral saam met hulle gegaan het - oral waar Hester gereeld moes wees.
Die hospitaal was een van die plekke.
"Hy ken elke saal en verkies die hysbak bo die trappe. Die bestuur van die hospitaal was baie gaaf en tegemoetkomend. Maar dit sou te veel wees vir Uska om heeldag langs my bed te lê, so hy het gedurende besoektye vir my kom kuier.
"Die hond het 'n privaat lewe en 'n professionele een, as hy sy harnas aan het, weet hy hy moet nou werk. Hy is opgelei om op my stem en opdragte te reageer. Hy weet ook dat sodra die harnas afgehaal word, hy nou kan speel," vertel Hester.
Johan sê hulle het ook hindernisse in die agterplaas waar hulle Uska en hul ander hond, Yster, laat oefen. Hy sê hulle besef nou hoeveel ure per dag dit neem om werklik jou hond te ken. "Uska is so goed opgelei dat hy nie sal blaf of op mense spring wat nader kom nie."
Hester vertel gereeld vir mense haar storie, en veral omdat kinders opgewonde raak en aan die hond wil vat en vryf.
Hulle sal graag net mense wou inlig oor die voordele van 'n gidshond, en is dankbaar vir al die sakelui in die dorp wat hulle toelaat om met Uska in winkels rond te stap.
Hester en Uska.
Ons bring jou die nuutste George, Tuinroete nuus'
