GEORGE NUUS - Landdros Pumela Yono het gister in die Thembalethu-streekhof 'n voorbeeld van 'n man gemaak wat 'n hond in 'n swart plastieksak aan die brand gesteek het, deur hom 'n vonnis van 12 maande gevangenisstraf op te lê.
Volgens die dierebeskermingswet is dit die maksimum vonnis vir só 'n misdaad in 'n landdros- of streekhof.
Willem Snyders (38) van Borcherds het op 22 Junie skuldig gepleit om 'n klag van dieremishandeling. Snyders het op 9 Januarie 'n Duitse herders-kruising met 'n tou om haar nek tot by 'n afgeleë area gesleep, waar hy die hond in 'n swart plastieksak gesit en aan die brand gesteek het.
'n Video wat deur 'n jong ooggetuie geneem is, wys hoe laggende kinders toegekyk hoe die wrede daad gepleeg word, en skreeu, 'maak dood die hond' en gooi paraffien op'.
Inspekteur André Baartman van die Dierebeskermingsvereniging (DBV) wat die oproep hanteer het, het met sy aankoms op die toneel die erg beseerde en getraumatiseerde hond gevind.
Die hond is later daardie dag weens die aard van haar beserings van kant gemaak om haar uit haar lyding te verlos.
Dr. Elke Schwellnus wat die nadoodse ondersoek gedoen het, het gister 'n beskrywing van die hond se beserings aan die hof gegee.
Dié hond het 'n geskeurde lewer, gebreekte ribbes, erge kneusingswonde en graad twee tot drie brandwonde op haar agterbene opgedoen.
Volgens Schwellnus, weens die aard van die hond se beserings sou sy dit nie oorleef het nie.
Landdros Yono het bygevoeg dat diere aan die mens gegee word om versorg te word en dat Snyders se optrede toon dat hy geen respek vir diere het nie.
Sy het tydens vonnisoplegging gesê dat Snyders nooit weer 'n dier mag besit of hanteer nie.
Inspekteur Baartman het na afloop van die hofverrigtinge aan die George Herald gesê, dat hy hoogs tevrede met die vonnis is.
Die res van die DBV het die vonnis met blydskap hanteer.
Dr. Elke Schwellnus en Inspekteur André Baartman van die Dierebeskermingsvereniging (DBV) het die vonnis verwelkom. Foto: Henrica Veldman
Vorige artikels:
- Dieremishandelaar nog nie gevonnis
- Man skuldig aan hond se wrede dood
- Man weer vas na hond se branddood
- Opvolg: Hond aan die brand gesteek
- Opvolg: Man vas na hond se gru-dood
- Opvolg: Hond aan die brand gesteek
- Hond aan die brand gesteek
ARTIKEL: HENRICA VELDMAN, GEORGE HERALD JOERNALIS.
'Ons bring jou die nuutste George, Tuinroete nuus'
