GEORGE NUUS - Meer as dertig besonderse bome in George is uitgewys in ‘n projek wat vanjaar deur die George Erfenistrust van stapel gestuur is om die vernaamste bome in George te identifiseer.
“George is ‘n besonder boomryke stad, maar tog is daar sekere bome wat uitstaan,” sê Philda Benkenstein, voorsitter van die Erfenistrust.
Die Erfenistrust beywer hom vir die goeie behoud van George se historiese, kulturele en natuurlike erfenis.
Benkenstein sê die doel was om betekenisvolle bome uit ‘n erfenisoogpunt te identifiseer. "Daar is gekyk na groot bome en ou bome, bome wat in die openbare oog is, bome wat ‘n geskiedenis het en bome wat deel van die erfenislandskap van George is."
‘n Hele aantal van die bome wat nou gelys word, is meer as ‘n honderd jaar oud. Party van die eike in Pacaltsdorp en rondom die bopunt van Yorkstraat dateer uit die beginjare van George, 200 jaar gelede.
Die trust is met die projek bygestaan deur lede van die Dendrologiese Vereniging se Outeniekwa-tak, kenners van Saasveld en ander belangstellendes. Enkele bome soos van die hemelhoë palms en ‘n tamaai wildevy moet nog botanies geklassifiseer word.
Die trust hoop om naambordjies by bome in openbare plekke aan te bring, soos die trust se kenmerkende blou en grys bordjies by historiese geboue in die middedorp.
“Intussen nooi ons graag mense om verdere betekenisvolle bome vir oorweging aan te meld,” sê Benkenstein. Mense kan inligting oor bome deurgee aan Mike Cameron by Mike.Cameron@nmmu.ac.za of Joh Groenewald by johgroen@mweb.co.za.
*The George Heritage Trust has initiated a project to identify significant trees in George, as seen from a heritage perspective, and has prepared a list of outstanding trees. Residents are welcome to submit further information. Contact Mike Cameron at Mike.Cameron@nmmu.ac.za or Joh Groenewald at johgroen@mweb.co.za.
Die lys van betekenisvolle bome:
(uitheemse bome se nommers het ‘n X vir eksoties)
Australian silky oak/Australiese silwereik
Reuse-silwereike agter Moederkerk
Cape ash/Essenhout
Reuse-essenhout by sorgsentrum, Missionweg, Pacaltsdorp
English Oak/Steeleik
Groep eike by kerkgeboue, Missionweg, Pacaltsdorp
Red flowering gum/Rooiblombloekom
Knysnaweg, by hoek van Groenkloofpad (by CTM en ooswaarts)
Petticoat palm/Katoenpalm
Ses groot palms by Mediclinic George, Gloucesterstraat
(geplant deur dr. Lamprecht, 1880's)
English Oak/Steeleik
Eikeboom by toerismekantoor, Yorkstraat (verkeerdelik genoem ‘n ‘slaweboom’) (42 m hoog)
English Oak/Steeleik
Groot eike in Courtenaystraat: hoek van Cradock, twee by Kerkstraat
Californian Redwood/Kaliforniese rooihout
Reuse- Kaliforniese rooihoutbome, Saasveld (geplant deur eerste bosboustudente in 1933)
Petticoat palm/Katoenpalm
Hoë palms in Yorkstraat: twee by Langenhovenstraat; een oorkant koöp; een voor Landbank)
Umbrella pine/Sambreelden
Groot den, hoek van Davidsonstraat en Arbourweg
Saligna gum/Salignabloekom
Sestien groot bloekoms by die ‘drif’ van Camphersdrif (Camphersdrifweg by riviertjie)
Blue gum/Bloekom
Groot bloekom by Fancourt se hoofingang
Quinine tree/Kinaboom
In terrein van Farmers Market
Bobbejaandruif
Ses reuse-bome by ds. Ballot se ou huis bokant Ballotsbaai, oorkant Thembalethu Primêre Skool, 3,3 km vanaf N2
European ash?/Europese essenhout?
Parkeerterrein Oakhurst Insurance, Yorkstraat
Common coral tree/Gewone koraalboom
Oos van katedraal, Cathedralstraat
Bladder-nut/Bostolbos
By draaisirkel in Melkhoutlaan, Wilderness
White milkwood/Witmelkhout
Groot melkhoutboom, hoek van Georgeweg en Leilalaan, Wilderness (oorkant ou poskantoorgebou)
Outeniqua yellowwood/Outeniekwageelhout
Standerstraat, langste geelhout-straatlaning in die land (2,1 km)
Pecan tree/Pekanboom
Pekanneutbome (30 m+) by ou hopsplaas, The Hop Gardens Road, Fernridge
Wild fig/Wildevy
Reuse-wildevy, hoek van Andrew Swartstraat en Hops Garden, Fernridge
Turkey oak/Moseik
10 Hops Garden Road, Fernridge
Cape chestnut/Wildekastaiing
Limberlost Lane, Wilderness en in tuin oorkant
Broom cluster fig/Besemtrosvy
Teetuin, Botaniese Tuin, Caledonstraat
Red flowering gum/Rooiblombloekom
Reuse blombloekom by Standerstraat 36 (historiese huis)
Laurel Magnolia/Loeriermagnolia
Voor Magnolia House, langs Arts Theatre, Yorkstraat
Radiata pine/Radiataden
Langs spoorlyn by Botaniese Tuin, teenoor draai van Andrew Swartstraat, Fernridge
Norfolk Island pine/Norfolkeilandden
Voor ou 1912-stadsaal, hoek van York- en Markstraat
Norfolk Island pine/Norfolkeilandden
Langs Patathuis in Missionweg, Pacaltsdorp
Bunya-Bunya/Boenjaboenja
By Café York, hoek van Fichat- and Yorkstraat
Wild fig/Wildevy
In die middel van inrit, ingang van Fancourt
Chinese fountain palm/Chinese fonteinpalm
Twee hoë palms in Standerstraat naby hoek Tarentaalstraat
LW Rondom Pampoenkraal, Saasveld, is ‘n aantal merkwaardige bome wat nog gelys moet word.
Philda Benkenstein, voorsitter van die George Erfenis Trust, by 'n reuse eikeboom voor die NG Moederkerk wat destyds deur die trust geidentifiseer is as 'n spesiale boom. Foto's: Michelle Pienaar
ARTIKEL: ILSE SCHOONRAAD, GEORGE HERALD - REDAKTEUR
'Ons bring jou die nuutste George, Tuinroete nuus'
