Bejaarde se dood: Familie 'wil afsluiting kry'

GEORGE NUUS - Ulricke Petho, kleindogter van wyle Eileen Venter van die Tuiniqua-sentrum vir bejaardes, het per e-pos reageer op die artikel in verlede week se George Herald waarin Tuiniqua se hoof, Hannetjie Neuper, haar weergawe uiteensit van gebeure met Venter se dood op 18 November verlede jaar.

Petho sê onder meer dat die buurvrou wat op haar ouma afgekom het, haar 'Ouma Ei' se kamer as deurmekaar beskryf het met kaste en laaie wat oopgeruk was en goed wat rondgelê het. Petho noem ook dat daar items uit haar ouma se eenheid gesteel is.

Sy verwys na verskeie faktore wat haar ontstel, onder meer 'n oortreder wat daardie oggend op die terrein was wat met twee sakke weggehardloop en oor 'n heining met veiligheidsdraad gespring het toe 'n inwoner hom opmerk.

"Van die items wat uit die sakke geval het toe hy oor die draad spring, asook die bedsokkies wat op die draad vasgepen was, is ouma se eiendom."

Petho verwys ook na die juweliersboksie met haar oupa se doodsberig in wat op die toneel gelê het waar die oortreder oor die heining gespring het. "Spreek dit nie vanself waar dit vandaan kom nie?"

Sy sê verder dat haar ouma se buurvrou die oggend by haar ouma se woonstel was om haar mee te deel dat sy later die oggend dokter toe gaan. "Sy roep ouma en probeer die deur oopstoot, maar dit is asof iemand die deur van binne af toedruk sodat sy nie kan inkom nie. Die buurvrou vind dit snaaks, maar gaan toe maar weer terug na haar eenheid, net om later weer vir ouma te gaan sê, en haar dood aan te tref op die vloer."

Petho het ook vrae oor die bloed op die toneel en haar ouma se kopbeserings.

Sy sê dat sy en haar ouers eers tussen 14:30 en 14:45 na haar ouma se woonstel is op die dag van haar dood om haar besittings te gaan oppak, en nie om 13:45 soos dit volgens Neuper gebeur het nie. Verder het sy haar ouma se goed in haar ouma se tasse en 'n plastiekskottel gepak, nie in kartondose nie.

Petho sê uit die aard van haar werk is tyd 'n faktor en sy moes die middag afvra om na haar ouma se woonstel te kon gaan. "Ek het gepak om my moeder te beskerm om deur die trauma te gaan."

Hulle moes die sleutel by personeel kry om toegang tot haar ouma se eenheid te verkry.

Volgens Petho het Neuper nie daardie dag by die woonstel met hulle medelye kom betoon nie.

"Inteendeel, die dag van ouma se dood het ek nie vir mevv. Neuper of Van der Walt gesien nie, wel die ander personeel wat medelye kom betoon het."

Petho sê al wat hulle soek is, "die waarheid - sodat ons afsluiting kan kry oor hierdie nare gebeure. Ek verstaan dat hierdie insident enige plek kon gebeur het, aangesien dit die tye is waarin ons lewe."

Klik hier vir vorige artikels:

ARTIKEL: ALIDA DE BEER, GEORGE HERALD-JOERNALIS

'Ons bring jou die nuutste George, Tuinroete nuus'