OUDTSHOOORN NUUS - 'n Aangename, ontspanne atmosfeer het in Oudtshoorn se strate en feesterreine op die openingsdag van die Klein Karoo Nasionale Kunstefees geheers.
Die strate van Oudtshoorn was Paasvrydag gepak met feesgangers wat drentel, kuier by die Rivierbuurt se markiestente, en hul lyf kultuurvraat hou by al die menigte visuele en beeldende vertonings. Al die bestanddele is vanjaar weer daar om groot skares te lok met die room van Afrikaner-kunstenaars, die populêre RSG-verhoog en biertent asook buitengewoon goeie visuele kunsuitstallings oral in die dorp.
Die uitvoerende hoof, Rhodé Snyman, het haar tevredenheid uitgespreek en gesê: "Dit is net op waarneming, maar dit wil voorkom asof die fees vanjaar besiger is as vorige jare. Bywoningsgetalle sal eers na die afloop van die fees op Saterdag 11 April beskikbaar wees." Sy het bygevoeg dat om die hoofstraat meer kleur en geur te gee is daar vanjaar meer straatkunstenaars wat ook saans om 20:00 optree. Daar is ook 'Pop-up' Bazaars in Baron van Reedestraat waar meer Oudtshoornkos beskikbaar is.
Die vermaak is soos altyd puik. In die Huis-genoot se Afskop-verskeidenheidskonsert het bekendes soos Theuns Jordaan, Bobby van Jaarsveld, Kurt Darren, Karen Zoid, Snotkop, Francois van Coke en Kahn Morbee geskitter. Verder is daar Elvis Blue wat (vandag) Donder-dag 9 April in die Absa-burgersentrum optree met sy vertoning Horison en McCully Workshop met 'Work in progress' is ook te sien.
Die Afrikaans Onbeperk-pryse is vanjaar uitgedeel aan Verna Vels (haar Liewe Heksie : Flower Power, ''n lekkerkry-pantomime' is van 4 tot 11 April om 09:30 in die Absa-bur-gersentrum), Nicola Hanekom, Wessel Pretorius (teatermaker), Peter Magubane (fotograaf), die bekende Suid-Afrikaanse akteur Marius Weyers en Janine Neethling (teatermaker/regisseur en teksskrywer van ongewone toneelstukke). Weyers kry die prys vir vertolking as kunstenaar en Peter Magubane se foto-uitstalling in die Absa-galery in Baron van Reedestraat is merkwaardig.
Bekendes
Sandra Prinsloo tree op in die toneelstuk Die Seeumeeu. Tussen die bekende toneelstukke vanjaar is PG du Plessis se Siener in die Suburbs met Trix Pienaar, André Rossouw en George Ballot. Nataniël vertel agt van sy beste stories in Die Beiteljie-teater. In die kontemporêre musiek/vermaak-afdeling het 'n hele reeks van bekende kunstenaars insluitende Kurt Darren, Emo
Adams, Shaleen Surtie-Richards, en Zayn Adams, in die Son Top 40 Mix Masala opgetree. Musiekliefhebbers het nog baie om na uit te sien insluitende 'n optrede van Janine Neethling en Amanda Strydom op 9 April, 10 April en 11 April.
Aan mooi meisies het dit nie ontbreek op Vrydag by die KKNK se Rivierbuurt feesterrein waar Ilke van der Linde, Jessica Gerber, Chrismari Strydom en Esmarié Vermeulen onthul het dat hul gekom het om te smul aan die pizzas en die aartappelskyfiehappies. Foto's: Pauline Lourens
Anne Stapelberg se kragstem was 'n fees vir die oor by die by die kykNET Silwerskerm Pops Debuut 'n klassieke/komtemporêre musiekvertoning gehou by die Musiekplaas op Sondag. Foto: Hans van der Veen
ARTIKEL: PAULINE LOURENS, GEORGE HERALD-JOERNALIS
'Ons bring jou die nuutste Tuinroete, Klein-Karoo nuus'
