GEORGE NUUS - Inwoners van die Wildernesshoogte informele woongebied leef in uiters moeilike omstandighede, maar sedert die vestiging hier van 'n satellietgemeente van Hope Kerk 14 maande gelede, word baie gedoen om verligting te bring en weerlose en bejaarde mense by te staan.
"Daar is 355 inwoners wat in 98 hutte bly, sommige in 'n uiters swak toestand. Hulle deel nege krane en daar is een toilet vir elke vyf gesinne," vertel die gemeenskapsontwikkelaar, Annalie Cable.
Die gebied is ver van mediese dienste en winkels geleë en vervoer is duur.
Hoewel die plaaslike polisie gereelde klopjagte hou, is daar drank- en tikmisbruik wat tot misdaad en geweld lei, ook teen weerlose bejaardes soos Annie Margai, 'n ou dame wat ernstige brandwonde opgedoen het nadat 'n tikverslaafde warm olie oor haar uitgegooi het. Was dit nie vir die kerk se ontferming oor haar nie, sou sy dalk nie oorleef het nie.
"Dit het daaglikse sorg en R2 000 se verbande gekos om tant Annie te behandel," sê Annalie. Die gemeente steun op donateurs om hierdie uitgawes te dek.
Nog 'n inwoner, Rosie Kees (56), uitgeteer weens kanker, word so goed moontlik onder die omstandighede deur haar man, Hendrik, versorg. Hy kan haar nie alleen los nie; dus kan hy nie werk nie. Die gemeentelede het gesorg dat sy morfienstroop kry vir die pyn en 'n spesiale doek waarop sy lê sodat sy nie hanteer word wanneer sy omgedraai word nie, anders kry sy seer. Rosie kyk dapper vanuit haar bed in die kameralens vir 'n foto.
Maar sulke probleme ten spyt, is daar mense wat begin moed skep. Die 32-jarige Elmarie Oktober wat baie by die gemeente betrokke is, kon finaal uit 'n ongesonde verlede ontsnap danksy haar nuwe ondersteuningsnetwerk.
"Ek het 'n baie sterker mens geword en my oudste dogter het ook uit haar dop begin kruip," gesels sy. Sy leef deesdae haar liefde vir kosmaak in die gemeente se kombuis uit en hoop om spoedig boumateriaal by die munisipaliteit te kry vir haar eie sinkhuis.
In die gemeentekombuis word daar daagliks voedsame etes vir bejaardes en kinders voorberei met voorraad uit die groentetuin op die terrein. Enige inwoner kan ook sy eie groentetuintjie hier kom aanplant vir tuisgebruik.
Dienste
Daar is deesdae ook gratis oogklinieke deur The Visionary en dr. Maggie de Swardt besoek die woongebied gereeld om te diagnoseer, voorskrifte uit te gee en afsprake te maak. Hulp met ambulansvervoer word ook verleen.
Die People's Dispensary for Sick Animals (PDSA) en die dierebeskermingsorganisasie PAWS van Knysna besoek die gebied ook dilwels om na die diere se welsyn om te sien.
Vrydagaande is daar spanbousessies vir kinders, 'n jeugvrouebybelstudie en bidgroep is op die been gebring en berading word verskaf. Die kok, Lorraine Nel, het al 'n suksesvolle trompoppiegroep op die been gebring. In Maart word 'n speelgroep vir kleuters begin om motoriese ontwikkeling te verbeter en inskakeling by gr.R te vergemaklik.
Saam met die gemeenskap word daar ook vir beter dienslewering van die owerhede af beywer.
Vervoer bly 'n groot probleem en die gemeenskap wil bitter graag die GO GEORGE-busdiens hier hê. Almal was verheug oor die menslike nedersettingsdepartement se onlangse aankondiging dat die woongebied definitief geoormerk is vir 'n behuisingsontwikkeling. Tannie Hanna Frans het dit as "'n miracle" beskryf, en dit kan nie gou genoeg kom nie.
Annalie Cable, Hope Kerk se gemeenskapsontwikkelaar in Wildernesshoogte, is 'n vrou wat regtig omgee. Sy sê die inwoners hier is vooruitstrewend en wil beter omstandighede vir hulle kinders skep. Daar is gedurig mense wat vrywillig by die kerkterrein kom hulp aanbied.
ARTIKEL EN FOTO'S: ALIDA DE BEER, GEORGE HERALD-JOERNALIS
'Ons bring jou die nuutste George, Tuinroete nuus'
