GEORGE NUUSFLITS - Die George-munisipaliteit se werkersoptelpunt (WOP) in Industriëleweg oorkant Tekkie Town, word bedryf deur die plaaslike ekonomiese ontwikkelingsafdeling en hul databasis groei by die dag. Hulle nooi werklose ambagsmanne om te kom registreer.
Desmond Carolus, koördineerder van die optelpunt, sê: "Een van ons grootste suksesverhale is die onlangse aanstelling van agt permanente werkers vanaf die optelpunt by Travista, ‘n residensiële eiendomsontwikkelingsmaatskappy, wat in George oopgemaak het. Permanente werksgeleenthede is wat ons vir die werkers wil hê, maar talle werkers kry ook gereeld kontrakwerk," sê Carolus.
Hy het die publiek versoek om die projek te ondersteun en nie mans langs die pad op te tel vir werk nie. Hierdeur verseker die publiek dat hulle ‘n betroubare werker in diens neem en ook ‘n verwysingsraamwerk van die persoon het.
Vir verdere navrae bel die kantoor by 044 801 9173 of Desmond Carolus by 076 652 1657.
‘n Groentetuin word suksesvol beman by die optelpunt en die opbrengste word aan die gemeenskap geskenk. Groente word aan die Phambili veiligheidshawe vir mishandelde vroue en kinders, Rosemoor Ouetehuis, Bethesda Hospice en skole geskenk. Van links is Thembalani Dassie (Breede-Gouritz catchment management agency), Ben Booysen (department van landbou), Desmond Carolus en Jenny van der Walt van Conville Primêr.
Lees meer in Donderdag se George Herald, asook aanlyn.
'Ons bring jou die nuutste George, Tuinroete nuus'
