GEORGE NUUS - 'n Wolk van rou en skok hang oor die dorp nadat drie jong mans van George, met 'n bakkie teen 'n krans by Voëlklip langs Heroldsbaai in die see gestort het.
Luandro Jansen (21) en MarNic Els (20) se liggame is Maandag uit die wrakstuk van die wit Toyota Hilux Dakar met meganiese kake bevry. Die bakkie, wat aan Luandro behoort en deur hom bestuur is, het sowat 130 m ver in 'n kloof op sy dak onder die water gelê.
Die derde jong man, Werner Finger (20), is nie in die bakkie gevind nie en is steeds soek. Daar word vermoed dat Finger, wat agter in die voertuig was, uitgeslinger is toe die linker agterdeur weens die impak teen die rotse afgeruk is.
Die drie het na verneem word Saterdagaand eers saam met vriende in George gekuier en toe by McDonald's gaan eet voor hulle na die uitkykpunt by Voëlklip is. Hulle het glo gery tot by die kruis vanwaar die uitsig oor Heroldsbaai se liggies in die nag baie mooi is. Hulle sou toe op Oubaai gaan braai en het reeds weggedraai van die kruis toe die ongeluk gebeur het.
Kapt. Malcolm Pojie, Suid-Kaapse polisiewoordvoerder, sê die voorval het tussen Saterdagnag en Sondagoggend plaasgevind. "Een van die seuns se ouers het hom Sondagoggend as vermis aangemeld nadat hy nie by die huis opgedaag het nie. Die bakkie is Sondag in die see opgemerk na 'n soektog die polisie daarheen gelei het. Die presiese oorsaak van die ongeluk is onbekend, maar ons vermoed die bestuurder het beheer oor die voertuig verloor waarna dit die grondpad verlaat en teen die krans afgestort het," sê Pojie.
Metro-reddingswerkers is Sondagaand teen die krans af en het Jansen en Els in die voertuig se kajuit gesien. Beide was vasgekeer en hulle het veiligheidsgordels aangehad. Maandagoggend het Metro en ander rolspelers met die reddingspoging, wat deur rowwe seetoestande en hooggety bemoeilik is, begin. Die eerste liggaam is omstreeks 11:45 uit die kloof gelig en kort daarna is die tweede liggaam ook boontoe gebring.
'n Emosionele Carlize Els, MarNic se ma, het aan die George Herald gesê haar seun was geliefd en gewild. "Hy het baie mense se lewens aangeraak en sy lewe met hulle gedeel. Hy was ook baie lief vir die see, diere en die plaaslewe."
MarNic, 'n oudleeder aan Hoërskool Outeniqua, het verlede jaar aan die Nelson Mandela Metropolitaanse Universiteit (NMMU) studeer en het vanjaar sy meester-seiljagsertifikaat deur die Royal Yacht Academy in Engeland gedoen.
'n Troosdiens vir MarNic word môre (Vrydag 20 November) by die NG Moedergemeente gehou. Hy laat ook sy pa, Chris, en 'n jonger suster, Beaulize (17) agter.
Hannes Bornman, Luandro se oom, het hom as 'n "gentle giant" beskryf wat met "stilswye liefde betoon het". "Hy het altyd geglimlag en dit was 'n voorreg om hom te ken. Hy het voor my groot geraak."
'n Diens word Saterdag om 11:00 vir Laundro by die Liberty Christian-kerk in Hopestraat gehou. Na die diens sal sy jonger broer, Janré en nog vriende met hul branderplanke by Victoriabaai uitswem waar hulle sy as en blomme sal strooi ter nagedagtenis aan sy groot liefde vir die see. Luandro was 'n kommersiële duiker en is ook 'n voormalige NMMU-student. Hy word oorleef deur sy pa Pieter, ma Ria en broer, Janré.
Chris, Carlize en Beaulize Els sê vaarwel
Dit is met groot hartseer dat ons afskeid neem van ons geliefde seun en broer MarNic Els. In sy lewe het MarNic baie mense se lewens aangeraak en sy lewe met hulle gedeel. As familie wil ons dankie sê aan almal wat hom in hul huise ontvang het, sy onuitputbare honger gevoer het en hom omarm het met liefde.
MarNic het die hele George as sy familie gesien en was vriende met jonk en oud. Ons het spottenderwys altyd gesê as MarNic eendag groot is gaan ons 'n advertensie in die koerant plaas om almal te bedank wat MarNic gevoer het, min het ons geweet die dag sou so vinnig kom.
Ons dank gaan ook uit aan die polisie, verkeer en al die ander nooddienste wat deel was van die reddingsoperasie.
Klik hier vir vorige artikels:
- Update: Bakkie plunges down cliff
- Bakkie plunges down cliff: 3rd man missing
- Bakkie plunges down cliff: 1 body recovered
- Bakkie plunges down cliff, 3 killed
- Bakkie met 3 mans stort in see
Werner Finger word steeds vermis.
MarNic Els (20)
Luandro Jansen (21)
Die bevryding van die liggame van twee van die jong mans uit die wrak van die bakkie nadat dit teen die krans afgestort het, is bemoelik tydens hooggety. Reddingswerkers van Metro-nooddienste en lede van die Suid-Afrikaanse-bergklub (Suid-Kaap) moes wag vir laagwater voor hulle die liggame van MarNic Els (20) en Luandro Jansen (21) uit die wrak kon sny. Die Toyota-bakkie het in 'n kloof 130 m ver op sy dak beland. Die liggaam van Werner Finger (20) is nog soek. Hy het agter in die bakkie gesit.
ARTIKEL: LIZETTE DA SILVA, GEORGE HERALD - NUUSREDAKTEUR
'Ons bring jou die nuutste George, Tuinroete nuus'
