Tuiniqua-hoof: 'So het dit gebeur'

GEORGE NUUS - Die hoof van die Tuiniqua-sentrum, Hannetjie Neuper, het haar kant van die saak gestel oor bewerings van manipulasie en intimidasie wat ongelukkige familie van inwonende bejaardes teen die bestuur van die sentrum gerig het.

Die familie van wyle Eileen Venter, wat op 18 November dood in haar woonstel aangetref is, was ook ontevrede omdat haar kamer opgeruim is voordat die polisie ontbied is.

Volgens Neuper is die polisie nie deur Tuiniqua ontbied nie omdat daar geen vermoede bestaan het dat daar ‘n misdaad gepleeg is nie.

"Soos met enige insident waar iemand geval het, het die verpleegkundiges opdrag gegee dat daar opgeruim word. Wyle mev. Venter se liggaam is ongeveer 12:30 deur die begrafnisondernemer verwyder en om 13:45 het ek en mev. Van de Walt na die woonstel gegaan waar wyle mev. Venter se kleindogter reeds besig was om besittings in kartondose te verpak."

Op die bewering dat Neuper werknemers en inwoners belet het om in die polisieondersoek wat gevolg het, met die ondersoekbeampte te praat as sy nie teenwoordig is nie, het sy gesê dat die koerant se bron, "duidelik daarin geslaag het om die George Herald met gruwelike leuens om die bos te lei".

"Daar is geen rede waarom ek enigiemand wat eerstehandse inligting rakende die insident het, sou belet om met enigiemand te praat nie. Ek self het ook maar net inligting soos wat dit aan my deurgegee is deur die verpleegkundiges en die twee inwoners wat eerste op mev. Venter afgekom het."

Só het dit gebeur

Volgens Neuper het Venter se buurvrou deur middel van die interkomstelsel die ontvangsdame in die kantoor ingelig dat Venter geval het en 'n verpleegkundige ontbied. "Suster De Bruyn van die siekeboeg is gevra om na mev. Venter se woonstel te gaan aangesien suster Greyling (kliniek/behuisingsuster) op daardie stadium by ‘n ander woonstel was waar die ambulans ‘n dame kom haal het om gehospitaliseer te word."

Sr. De Bruyn is na mev. Venter se woonstel en het op haar beurt weer die ontvangsdame deur die interkom gevra om vir sr. Greyling te roep en haar te vra om die ambulanspersoneel ook na Venter se woonstel te bring, sê Neuper.

"Die ontvangsdame het my gevra of ek ook na mev. Venter se woonstel gaan en my antwoord aan haar was dat daar twee susters en die ambulanspersoneel is, ek sou net in die pad wees. Ek het wel later na die woonstel gestap en het sr. Greyling gekry wat op pad terug was na haar kantoor. Sr. Greyling het my die gedrukte bewys gewys wat die ambulanspersoneel met hul draagbare EKG geneem het - dit het ‘n 'flat line' aangetoon. Ek het sr. Greyling gevra wat gebeur het. Sy het my meegedeel dat mev. Venter ‘n massiewe hartaanval gehad het."

Volgens Neuper het Greyling haar meegedeel dat mev. Venter se buurvrou ‘n doefgeluid ('thump') gehoor het soos iemand wat val. Toe sy gaan ondersoek instel, het sy mev. Venter op die vloer aangetref.

"Voordat sr. De Bruyn daar was, het daar ook nog ‘n inwoner verby die woonstel geloop wat ook ingeloer het. Nie die susters of ambulanspersoneel of inwoners het enigsins aangedui dat daar enige vermoede bestaan dat daar dalk ‘n misdaad plaasgevind het nie," het Neuper gesê.

Sekuriteitsvideo

Sy het gesê daar was 'n man met twee sakke op die terrein op die dag van Venter se dood wat op 'n sekuriteitsvideokamera afgeneem is. 'n Persoon het ook oor die heining tussen Tuiniqua en 'n buurvrou Truida Oosthuizen, se erf geklim. Laasgenoemde het Neuper in kennis gestel dat sy vermoed dat van die goed wat sy in haar erf opgetel het, van Tuiniqua se terrein afkomstig was.

"Die inwoner wat die betreder met die sakke op Tuiniqua se terrein gesien het, het by my in die kantoor gestaan toe mev. Oosthuizen gebel het - ons het op daardie stadium deur die *CCTV 'footage' gegaan om te sien of ons die oortreder op kamera vasgelê het."

Neuper sê sy en die inwoner het ook gestap na waar twee bedsokkies en 'n tekkie aan mev. Oosthuizen se draadheining gehang het. "Op die grond het onder andere ook ‘n plastiek kleutersonbril gelê."

Tye van gebeure

Oor die familie wat voel dat die polisie dadelik na Venter se woonstel ontbied moes gewees het, het Neuper verduidelik dat die oortreder op Tuiniqua se terrein reeds meer as 'n uur van die terrein af was toe mev. Venter se buurvrou haar hoor val het.

"Die gebeure se verskillende tye kon presies deur middel van die CCTV ‘footage’ vasgestel word. Daar was dus geen rede waarom enigeen van Tuiniqua sou dink ons moes die polisie ontbied nie. Volgens die verpleegkundiges het mev. Venter met haar kop teen ‘n waaier gelê - daar was geen bloed op mev. Venter se klere nie, daar was nêrens bloedspatsels nie - slegs ‘n kleinerige bloedkol onder die sykant van haar kop soos wanneer iemand teen iets geval het en so beseer is.

Volgens Neuper het daar die dag ná Venter se dood "soveel stories en bespiegelinge" die ronde gedoen dat sy die voorsitter van die bestuurskomitee, Murray Gerber, ontbied het en hom meegedeel het van die gerugte.

"Mnr. Gerber het my meegedeel dat ek niks moet doen nie - ons moes wag vir die doodsertifikaat en wanneer die oorsaak van dood bekend is, sal ons besluit wat ons optrede sal wees. Van die inwoners het my aangeraai om polisie toe te gaan, maar ek het hul meegedeel dat ek die aangeleentheid met mnr. Gerber bespreek het en dat hy my opdrag gegee het om nie op daardie stadium enigiets te doen nie."

Die uitverf en teël van Venter se woonstel is volgens Neuper standaard praktyk. Alle woonstelle wat ontruim word, word uitgeverf en opgeknap. Woonstelle wat nog Novilonvloere het, word geteël.

Notule vertel ander storie

Gerber het by navraag op Neuper se stelling gereageer deur die notule aan te haal van 'n volle bestuursvergadering op 10 Desember 2015 waarin Neuper ‘n verduideliking aan die bestuurskomitee gegee het. Dit lees soos volg: Par 1: “Die Vrydag deur etenstyd het mev. Neuper-hulle gaan kyk by Courtenayhof by die draad vir ‘n gat in die draad. Hulle het wel gesien dat daar ‘n graaf onder die takke lê en ‘n juweliersboksie wat oop lê met mev. Venter se man se doodsberig in."

Par 2: "Mev. Neuper het onmiddellik onraad vermoed en dadelik vir Murray Gerber gebel om te vra wat haar te doen staan. Murray se antwoord was, 'Kom ons wees rustig totdat ons die doodsertifikaat kry'."

Gerber het bykomend gesê: "Eerstens het mev. Neuper my nie dadelik deur etenstyd geskakel nie, maar eers om 15:18. Tweedens het ek nooit vir mev. Neuper gesê dat sy niks moet doen nie en ook nooit vir haar opdrag gegee om nie op daardie stadium enigiets te doen nie. My woorde aan haar was soos uiteengesit in die notule. In mev. Neuper se verklaring aan die polisie is dit presies die woorde wat ek vir haar gesê het."

Die polisie het verlede week gesê dat hul ondersoek na Venter se dood feitlik afgehandel is.