Sarra wil voor lughawe betoog

GEORGE NUUS - Die rugby-drukgroep Sarra (Supporters Against Racist Rugby Associations) het aansoek gedoen om môre (Vrydag) 'n vreedsame plakkaatbetoging voor George-lughawe te hou. Vrydag 11 September is ook die dag waarop die Springbok-rugbyspan na Engeland vertrek na die Rugby Wêreldbeker.

Volgens Dawid Kamfer, die groep se stigter en sameroeper, sal die betoging deel vorm van die groep se protesaksie teen die huidige onregverdige stelsel binne die rugbygilde.

"Ons erken die feit dat lughawens deel vorm van nasionale kernpunt-areas. Daarom vra ons toestemming om voort te gaan met 'n plakkaat-protesoptog by die ingang na die lughawe, by die Haroldsbaai-afdraai," lui Kamfer se aansoek.

"Ons protes sal vreedsaam wees, sonder enige ontwrigting van die verkeer en werksaamhede by die lughawe." Hulle het teen druktyd nog op terugvoer van die Airports Company SA (Acsa) se hoofkantoor gewag.

Sarra beoog om afvaardiging na rugby se Wêreldbeker te stuur om die organisasie te vra om die Springbokke se internasionale deelname op te skort. Sarra beywer hulle vir 'n nuwe era in rugby waarin spelers "volgens meriete" gekies word.

Hulle reken daar is genoeg swart en bruin spelers wat op meriete gekies kan word. Die samestelling van die huidige SA- rugbyspan dra nie hulle goedkeuring weg nie. Die drukgroep het verlede Saterdag 'n strategiese vergadering by George Korrektiewe Dienste gehou.

Hulle onderneem om saam met Sarra-verteenwoordigers môre by die OR Tambo-lughawe 'n protesaksie te hou.

Hulle sal daar simbolies 'n Springboktrui in 'n doodskis sit, as teken van die einde van 'n apartheidsimbool. "As ons nie by die lughawe regkom nie, gaan ons dit steeds elders in George doen," het Kamfer bevestig.

Sarra beplan 'n gala-geleentheid waartydens oud-rugbyspelers vereer sal word. Geld wat by die geleentheid ingesamel word, sal in 'n trust gehou word, ten bate van behoeftige spelers en oudspelers.

Lees vorige artikels hier:

ARTIKEL: MICHELLE PIENAAR, GEORGE HERALD - JOERNALIS

'Ons bring jou die nuutste George, Tuinroete nuus'