Rylopers kaap motoris

GEORGE NUUS - 'n Plaaslike motoris is Saterdagmiddag (14 Januarie) in Davidsonweg gekaap nadat hy drie rylopers in Langenhovenstraat 'n rygeleentheid gegee het.

'n Dag later het hy een van die vermeende kapers by 'n vulstasie opgemerk en die polisie gekontak. Kort daarna het die polisie 'n tweede verdagte in hegtenis geneem en die gekaapte motor, 'n wit Mazda, in die Yorkstraat-begraafplaas opgespoor waar dit versteek was.

Volgens konstabel Rachel Hendricks van die George-polisie het die slagoffer die verdagtes en 'n vrou 'n geleentheid na 'n kitskosrestaurant in Courtenaystraat gegee.

"Op die hoek van Davidson- and Arbourweg, het een van die mans, wat soos 'n sekerheidswag geklee was, die slagoffer met 'n mes gedreig. Hy het die mes teen sy keel gedruk en hom gedwing om by Arbourweg in te ry. Die slagoffer kon daarin slaag om die mes te gryp en uit die motor te vlug. Sy linkerarm is in die proses beseer," sê Hendricks.

Die eienaar het glo weer sy motor genader waarna die verdagte in die sekerheidswagklere 'n vuurwapen, wat onder sy hemp was, te voorskyn gebring het. Die eienaar het weggehardloop en die voorval gerapporteer.

Die polisie het ook CD's en die luidsprekers wat uit die gekaapte motor gesteel is, by een van die verdagtes se woning gevind.

Die George Herald kon nie vasstel of die vrou wat saam met die verdagtes was, nog soek is nie.

Brigadier Phindelwa Mavakala het inwoners vandeesweek opnuut versoek om meer waaksaam te wees en op die uitkyk te wees vir verdagte persone en voertuie wat in hul woonbuurte rondbeweeg.

Sou 'n inwoner 'n verdagte persoon opmerk, moet hulle die polisie skakel en 'n beskrywing van die persoon verskaf.

Hulle kan ook hul sektorbevelvoerders by die volgende nommers skakel: