GEORGE NUUS - Daar was 'n beduidende afname in misdaad in die Sektor Polisieforum 2 (SPF2) gebied wat Camphersdrift, Heatherlands, Bo-dorp, Denneoord, Bergsig, Eden en Loeriepark insluit.
Misdaad is in effek gehalveer as die syfers van 2016 met 2017 vergelyk word. Dit is danksy die goeie samewerking tussen die polisie en die buurtwagte.
Só het kol. Michael Taylor gesê tydens 'n SPS2 vergadering Dinsdagaand in die Van Kervel-skoolsaal.
Kapt. Natasja Jansen van Vuuren, is drie mense gearresteer in verband met 'n huisbraak in Mei in Standerstraat. Die buitengewoon hoë waaksaamheid in die gebiede het egter wel tot gevolg gehad dat die misdadigers hul tot ander buurte gewend het. Skerp voorwerpe soos messe, pikstele en gereedskap wat daagliks van rondlopers gekonfiskeer word, dui daarop dat die oplettendheid nie vir 'n oomblik verslap kan word nie.
Moontlike roof deurbraak
Die polisie verwag dat die elektroniese opsporing van selfoonoproepe kan lei tot die arrestasie van drie gewapende mans wat twee besigheidsrooftogte uitgevoer het - dieselfde modus operandi is gebruik in beide voorvalle.
In 'n hele paar huisbrake is vingerafdrukke gevind wat verbind word met 'n paar individue en daar word binnekort arrestasies verwag, het kol. Taylor gesê.
Jaagtogte in Knysnaweg
Die roekelose jaagtogte wat plaasvind in Knysnaweg in die vroeë oggendure veral oor naweke, is kommerwekkend, het die voorsitter van Bergsig Crime Spotters, James Shackleton, gesê.
"My patrollie is gewoonlik tussen 02:00 en 04:00 en dit is tipies die tyd wat die manne onder die invloed is. Daar moet dalk gekyk word vir 'n wettige manier wat mense hul lus vir wedrenne kan uitvoer."
Hy het verskerpte optredes deur die verkeersowerhede bepleit. George-raadslede het gesê 'n vergadering is belê om die probleme te bespreek - veral die gedeelte wat bekend staan as die 'pad van die dood' na die Garden Route Mall.
'n Hele aantal noodlottige ongelukke het al plaasgevind by die berugte verkeerslig en inwoners wil hê dat die spoed afgebring word na 60 km/h.
Eerstestraat drentelaars
Van die verskerpte optredes wat oorweeg word teenoor George-bestuurders wat stop om geld of werk aan te bied aan werklose mense in Eerstestraat en Tweedestraat, sluit 'n minimumboete van R1 000 in. Die motoriste skep 'n gevaar vir ander bestuurders.
Pamflette gaan uitgedeel word om hulle hierop attent te maak. Werklose mense moet hulself aanmeld by die George-munisipaliteit om op hul databasis te registreer.
Die plaaslike owerheid bestuur die organisasie voorheen bekend as Men on the Side of the Road.
Blaffende keffertjies
Verder is dit genoem dat die GO GEORGE-busse nie in Standerstraat stop nie en dat blaffende honde 'n effektiewe manier is om misdadigers te ontmoedig om in te breek - mits hul eienaars die moeite doen om vas te stel hoekom 'Rufus' aanmekaar blaf. Indien 'n blaffende hond geïgnoreer word, is die dier net 'n hindernis en steuring vir die buurt.
Daar is van die vierpotiges wat dae aaneen blaf sonder dat die eienaar enigsins die moeite doen om die oorsaak daarvan vas te stel.
Die volgende SPF 2 vergadering sal op 3 Julie gehou word - die venue sal later aangekondig word.
Vir meer inligting skakel Bennie by 079 165 3647. Die SKF-vergaderings is oop vir bywoning vir almal in die buurt.
ARTIKEL & FOTO: PAULINE LOURENS, GEORGE HERALD-JOERNALIS
'Ons bring jou die nuutste George, Tuinroete nuus'
