GEORGE NUUS - Met 'n groen lig van die George-burgemeesterskomitee het die eienaars van 'n nuwe wildpark rede tot feesviering. "Ons is baie opgewonde en verlig," het JP Kameel, mede-eienaar van die George Wildlife Park, tydens 'n besoek gesê.
"Noudat ons toestemming het om die grond vir 'n park te gebruik (vergunningsgebruik), moet ons nog net ons finale bestuursplan by CapeNature indien. Ons hoop om dit binnekort te finaliseer."
Die voorgestelde park - langs die N2 in Kraaibosch naby die Victoriabaai-afrit - het sedert einde verlede jaar heelwat kritiek vanuit verskillende oorde ontlok, waaronder die NSPCA, plaaslike diere-aktiviste en omliggende bure.
Hieroor sug Kameel diep. "Die goedkeuring is 'n groot las van ons skouers af. Dit was maar rof," het hy gesê. "Ek dink die gemeenskap het mettertyd begin besef ons doen eintlik iets goed hier, waaruit hulle ook kan baat vind." Elri van der Gryp is die grondeienaar en gaan die park saam met Kameel bestuur. Sy is egter kronies siek nadat sy bakteriële meningitis opgedoen het. Van der Gryp is tans weer in Johannesburg vir 'n operasie.
"Vir die volgende maand, tot Elri terug is, gaan ons so stadigaan begin om die wiele aan die rol te kry," het Kameel gesê. "Ons sal begin met die plaveiwerk vir 'n parkeerarea, en om die veld skoon te maak sodat 'n mens beter beplanning kan doen oor waar wat moet kom."
'n Opvoedkundige sentrum, restaurant, padstal, kinderspeelplek, dammetjie, piekniek-area met tafels en stoele, twee kampe met wilde diere (bykans 2 ha) en 'n ontspanningsarea naby die kampe vorm deel van die beplanning. Die munisipale goedkeuring bepaal dat die aansoek binne twee jaar uitgevoer moet word. Die mikpunt is om 'n deel van die park reeds teen Augustus 2016 te open.
Volgens Kameel gaan mense hier 'n voorsmakie kry van wildlewe. "As hulle ander tipe wild wil sien kan hulle ander parke soos Jukani, Kango en Garden Route Game Reserve besoek. Ons wil fokus op die opvoedkundige aspek van wildlewe," het hy gesê.
Kameel het 11 jaar ondervinding met die grootmaak en opleiding van tiere en jagluiperds by twee plaaslike wildreservate. "Ek het my deel van pa-wees gedoen! Ek het meer as 20 Bengaalse tiere en 80 jagluiperds binne 'n bestek van ses jaar grootgemaak. Die jagluiperds was maar 18 dae oud toe hulle in my sorg geplaas is." Die plan is om twee tiere en twee jagluiperds te koop en by die park groot te maak. Hulle sal nie teel nie en sal ook nie deur besoekers gestreel word nie, maar sal mak genoeg wees om aan te pas by hul nuwe omgewing, aldus Kameel.
Kameel is baie opgewonde oor al hul planne, en nooi plaaslike kontrakteurs om hom te kom sien vir moontlike projekte. "Ons het so baie om te doen. Ons moet skoonmaak, kampe bou, 'n restaurant bou, kinderspeelplek, en nog baie ander dinge," het hy gesê. Verder is Kameel op soek na ponies, dwergbokkies en ander klein plaasdiere.
Vir inligting kontak hom by 084 249 0442.
Klik hier vir vorige artikels:
- NSPCA opposed to George Wildlife Park
- George Wildlife Park approved
- Update: Wildlife park approved
- George Wildlife Park approved
- Proposal for wildlife park reconsidered
- Katgeveg oor wildsplaaspark duur voort
- Update: Kraaibosch wildlife park
- Plans for Kraaibosch wildlife farm
Toeriste en besoekers gaan in hierdie area kan ontspan, met 'n uitsig oor die kamp waarin van die wilde diere rondbeweeg.
ARTIKELS EN FOTO'S: MICHELLE PIENAAR, GEORGE HERALD - JOERNALIS
'Ons bring jou die nuutste George, Tuinroete nuus'
