GEORGE NUUS - Kersfees is om die draai en die gewilde Kersete vir Huishulpe is weer op hande.
Verlede jaar was daar geen ete nie, weens die Covid-19-pandemie, maar die behoefte is so groot dat die organiseerders besluit het om hierdie jaar weer te probeer.
Die geleentheid is om dankie te sê aan die spesiale vroue wat in ons huise werk. Daar is twee datums om van te kies, Woensdag 8 Desember en Donderdag 9 Desember.
Vroue word met 'n spesiale middagete van 'n burger en skyfies, met roomys en koeldrank getrakteer, teen slegs R100 per persoon. Geronimo Spur is al meer as tien jaar deel van hierdie spesiale projek en bederf die dames elke keer met heerlike kos teen 'n baie spesiale prys.
Vanjaar vind die geleentheid weer by Geronimo Spur in Yorkstraat plaas en die middag se verrigtinge begin om 14:00. Daar is beperkte plek en bespreking is noodsaaklik.
"Verskeie werkgewers koop vir hulself ook 'n kaartjie om heerlik saam te kuier met hul huishulp en ek wil dit graag sterk aanmoedig. Hierdie is 'n ideale geleentheid om die spesiale vrou wat vir jou werk te bederf, so moet dit nie mis nie," sê een van die organiseerders, Juanita Myburgh.
Kaartjies is te koop by die Spur of kontak Juanita by 083 452 1773 om 'n plek te bespreek.
'Ons bring jou die nuutste George, Tuinroete nuus'
