NASIONALE NUUS - Diasstrand was die afgelope naweek gesluit nadat riool Vrydag, 14 Oktober in die see beland het.
Volgens alle aanduidings sal die munisipaliteit nie 'n besluit oor die heropening van die strand voor Woensdag kan neem nie omdat toetsresultate van watermonsters waarskynlik dan eers beskikbaar sal wees.
Volgens die waarnemende munisipale bestuurder, mnr Harry Hill, het 'n rioolinspeksiepunt naas Louis Fourieweg oorgeloop nadat 'n twee meter lange stomp van 'n garingboom daarin beland en 'n blokkasie veroorsaak het.
"Munisipale werkers het intussen die boomstomp verwyder nadat die rioolpompstasie in Kusweg gesluit is" aldus Hill. Hy sê die vermoede bestaan dat die stomp met opset in die stelsel geplaas is.
Verkeer op Louis Fourieweg in die Blue Waters omgewing van Diasstrand is ontwrig toe die riool oor die pad en tot op die strand gestroom het.
Verkeer is kortstondig ontwrig toe riool in 'n breë strook oor Louis Fourieweg afgestroom het en voertuie gemaan is om stadiger te beweeg om te keer dat die rioolvuil teen die voertuie opspat.
'Ons bring jou die nuutste Tuinroete, Hessequa, Klein Karoo nuus'
