SUID-KAAP NUUS - Die byebedryf in die Wes-Kaap word bedreig deur die gevaar dat Amerikaanse jongbysiekte, (American Foul Brood of AFB) epidemiese afmetings kan aanneem.
Daar word 'n dringende beroep op alle rolspelers in die byebedryf gedoen om in samewerking met die owerhede te help om die verspreiding van AFB te beperk.
‘n Inligtingstoer oor AFB en maatreëls oor die bekamping daarvan begin op 26 Februarie en eindig op 14 Maart. Nege dorpe word besoek en alle byeboere word dringed versoek om moeite te doen om ten minste een daarvan by te woon. Die skedule van die verskillende dorpe waar die inligtingsessies aangebied word verskyn onder aan die berig.
AFB is die eerste keer in 2009 in die Wes-Kaap identifiseer en het sedertdien deur die ganse Wes-Kaap versprei. Die siekte tas die jongby in die korf aan. Die byelarwes (jongbye) vrek en omdat die swerm nie kan vernuwe nie, sterf dit uit. Die siekte besmet ook wilde swerms wat deur byeboere gebruik word om hul swerms mee aan te vul.
“Die siekte het geen uitwerking op die mens of ander organismes nie en die heuning is veilig vir menslike gebruik,” sê Dawid Smit, bestuurslid van die Suid-Afrikaanse Byebedryfsorganisasie (SABIO) en Wes-Kaapse Byebedryfsvereniging (WKBV).
Die volgende praktiese maatreëls geld:
• Bestraling van ingevoerde byeprodukte is verpligtend.
• Besmette korfkomponente kan gesteriliseer word deur bestraling of kook in kerswas teen 160°C; anders moet dit verbrand word.
• Die gebruik van antibiotika om bye teen die siekte te beskerm is onwettig in Suid-Afrika.
“Dit maak sin om korwe en byegesondheid pro-aktief te bestuur deur ‘n hoë standaard van higiëne te handhaaf en korwe gereeld te inspekteer,” sê Smit.
Volgens Smit is dit meer as ooit tevore noodsaaklik vir byeboere om by die departement van landbou te registreer.
“Ons moet die byeboere se kontakbesonderhede hê sodat daar met hulle gekommunikeer kan word oor die gevare en bekamping van die siekte.” Die DAFF-registrasievorm is op DAFF en SABIO se webblaaie beskikbaar en registrasie is kosteloos.
Dit is verpligtend om AFB by DAFF aan te meld. Kontak Riaan van Zyl by 083 414 2494 of riaanvz@nda.agric.za indien AFB in korwe opgemerk word.
Skedule van inligtingsessies:
28 Februarie: Lakeside - 09:00 Oude Raapkraal, Westlakelaan, Lakeside
6 Maart: Hopefield - 09:00 Simple Bee, Kerkstraat 31A
6 Maart: Citrusdal - 19:00 Gouestroom Heuning, Hoopstraat 27
7 Maart: Vredendal - 09:00 NG kerksaal
12 Maart: Worcester - 09:00 NG kerksaal Worcester-Oos, h/v Murray- en Durbanstraat
13 Maart: Oudtshoorn - 09:00 Oudtshoorn-navorsingsplaas
13 Maart: Albertinia - 15:00 SSK Tuinroete Agri-saal
14 Maart: Stanford - 09:00 Overberg Honey Co, Fynbosstraat 15, Stanford Besigheidspark
Kontak Lynette Barnes, voorsitter van WKBV by 021 865 2050 of 071 241 1411 vir meer inligting.
'Ons bring jou die nuutste Tuinroete, Klein-Karoo nuus'
