SUID-KAAP NUUS - Vakansiegangers kan uitsien na 'n seisoen van uitstekende vermaak met van die land se topmusikante wat optree by die sewende Bush Lapa Musiekfees en Opelugkonsert naby Heroldsbaai.
George se enigste musiekfees en die Suid-Kaap se gewildste verhoogproduksie skop af op 14 Desember en 'n opwindende program word opgedis wat op 3 Januarie 2015 ten einde loop.
'n Totaal van 14 vertonings met nie minder nie as 60 kunstenaars word by die gewilde Bush Lapa by Herold's Bay Resort in 'n pragtige omgewing ongeveer 10 minute se ry buite George aangebied.
Dit is 'n fees vir die hele gesin, so oud en jonk is welkom om in hierdie topklas-ervaring te kom deel.
Geurige potjiekos en ander ligte etes sal elke aand beskikbaar wees en daar gaan weer gesellig om die groot vuur gekuier word.
- 14 Desember - Valiant Swart - 'n Sondag-ete met... (by die Down to Earth-venue)
- 17 Desember - Ray Dylan - eksklusief tot die fees
- 18 Desember - Chris Chameleon
- 19 Desember - Dozi - eksklusief tot die fees
- 20 Desember - Adam
- 22 Desember - Lianie May en Ricus Nel
- 23 Desember - Thys die Bosveldklong en Piet Pompies!
- 25 Desember - Kersbuffet met Carry en Trudie Canninga (Down to Earth-venue)
- 26 Desember - Opelugkonsert met Steve Hofmeyr, Arno Jordaan, Karen Ferreira en meer.
- 27 Desember - 'Simon and Garfunkel Tri-bute' deur Marcato
- 29 Desember - Jakkie Louw en Karen Ferreira
- 30 Desember - Die Heuwels Fantasties
- 31 Desember - Nuwejaarspartytjie met 'n dans, spitbraai en Flashback-band
- 2 Januarie - 'Tribute to Bob Dylan and Leonard Cohen' deur Koos van der Merwe
- 3 Januarie - Kitchen Jammin Blues Band
Etes deur die dag beskikbaar.
Down to Earth is bekend vir hulle smaaklike maaltye wat 'n mens geniet terwyl jy op die wye dek sit en na die lieflike uitsig oor die oseaan staar. Hierdie pragtige funksie-venue het 'n kroeg met 'n wye verskeidenheid drankies en gaan na verwagting weer gesellig krioel onder die besoekers gedurende die seisoen.
Romantiese troues en ander wonderlike funksies kan ook hier gehou word.
Die sjef het 'n opwindende à la carte-spyskaart, wat vars oesters insluit, vir die vakansieseisoen beplan, so maak seker jy bespreek 'n tafel.
Die Fees ondersteun die Eden Lions se Tip-a-Ton-projek vir minderbevoorregte mense.
'Ons bring jou die nuutste Tuinroete, Klein-Karoo nuus'
