GEORGE NUUSFLITS - Dit was in heerlike warm en sonnige weer dat Arno Greeff en Reine Swart, die hoofakteurs van Suid-Afrika se eerste branderplankry-film, Die Pro kennis gemaak het met Victoriabaai se plaaslike branderplankryers.
Dit was ook heel gepas dat hul gesels het met die Victoriabaaise branderplanklegende, Rod Hossack, oor hulle wedervaringe tydens die verfilming van Die Pro.
George Herald-joernalis Pauline Lourens berig dat die vinnige stop by Victoriabaai deel was van hulle bekendstellingstog wat in Johannesburg begin en gister in Kaapstad geëindig het waar hulle later die week die première van die film sal bywoon.
Arno, wat 'n maand lank vir die verfilming in Jeffreysbaai tuisgegaan het, het so aanklank gevind by die branderplanklewe dat hy sommer sy loopbaan wou opgee en homself wou oorgee aan die sorgvrye lewe in Jeffreysbaai.
Die grootste uitdaging vir Arno en Reine was dat albei moes leer branderplankry - al is die meeste van die aksie deur 'n plaasvervanger gedoen. Een van die vervaardigers, Annelie Bouwer het saam gereis op die bekendstellingstog deur die land.
Die première wat op Vrydag 28 Augustus in Kampsbaai vertoon word, maak deel uit van die kykNet Silwerskermfees in Kaapstad.
Lees volgende week meer in die George Herald, en aanlyn.
'Ons bring jou die nuutste George, Tuinroete nuus'
