GEORGE NUUS - Evergreens het Saterdagmiddag voor 'n volgepakte skare by die Pacaltsdorp-sportterrein vir Progress met 26-22 geklop.
Dit was 'n naelbytstryd in die nat omstandighede wat opwindende rugby opgelewer het.
Evergreens se karakter en ervaring om in gelykopwedstryde kalm te bly, was deurslaggewend. Hulle het 'n vroeë agterstand van 14-0 uitgewis om rustyd met 19-14 voor te loop. Net ná rustyd het hulle 'n bonuspunt drie gedruk.
Progress het egter laat in die wedstryd goed teruggeveg, maar puik verdediging het hul verhoed om die wenpunte aan te teken. Hier het Luzanne Williams (heelagter) van die tuisspan twee sekere drieë gekeer met goeie duikslae.
Voorlangs was niemand beter as die tuisspan se klipharde agtsteman, Gershwin Muller, nie. Muller, wat 'n puik drie gedruk het, het geskitter op die aanval en verdediging. Elroy Louis (skrumskakel) verbeter weekliks en sy puik diens agter sy pak voorspelers het talle aanvalsgeleenthede agterlangs geskep. Sy puik individuele drie onder die pale het die skare op hul voete gehad.
Williams het geskitter in die laaste vesting en sy kanonvoet het telkemale druk verlig.
Vir die besoekers voorlangs het hul slotpaar, Gaywin Smith en Channold Mitchell, en lostrio, Leroy Dickens, Jonathan Simons en Devron Jansen, die vonk verskaf. Hul skakelpaar, Kerwin Appollis (skrumskakel) en Henrico Scott (losskakel), het ook goed gekombineer.
Vir Evergreens is Muller, Dowayne Smart (linkervleuel), Divandré Strydom (buitesenter) en Louis oor vir drieë Leegan Moos (losskakel) slaag met drie doelskoppe.
Lushiano James (linkervleuel), Dickens en Mitchell het vir die besoekers gaan druk. Scott slaag met 2 doelskoppe en 'n strafdoel.
Evergreens se tweede en derde spanne het ook onderskeidelik met 12-0 en 13-3 geseëvier. Vir die tweede span het Eugene Heneke (losskakel) met 4 strafdoele geslaag. Phillip Marx (agtsteman) is vir Evergreens se derde span oor vir 'n drie. Elroy Stalmeester (heelagter) slaag met 'n doelskop en 'n strafdoel en Chadley Stride (losskakel) het ook 'n strafdoel oorgeklits.
Vir Progress het Yannick Holtman (buitesenter) met 'n strafdoel geslaag.
Barbarians het vir Swellendam op sy tuisveld met 23-6 geklop. Die wenspan is tweede op die punteleer met 27 punte en 'n punteverskil van +90.
Vir die wenspan het hul flank Bradley Sumaro uithalerspel gelewer en is aangewys as speler van die wedstryd.
Barbarians se drieë is gedruk deur Wahlon Anthony (heelagter) en Jerome Fillies (regtervleuel). Morné Buis (skrumskakel) slaag met 'n doelskop en 3 strafdoele en Wilbur January (plaasvervanger-losskakel) het ook met 'n doelskop geslaag.
Barbarians se tweede en derde spanne het met 38-8 en 32-16 gewen. Vir die wenspan se tweede span is Kervin Taute (heelagter), Addington Mondo (linkervleuel), Vivian Groenewald (loskopstut), Gary Olckers (plaasvervanger-loskopstut) en Chester Mitchell (regtervleuel, 2) oor vir drieë. Mondo slaag ook met 3 doelskoppe en Linden Rhode (losskakel) met 'n doelskop. Leroy Koopman (slot) is aangewys as speler van die wedstryd.
Vir Barbarians se derde span het Leolan Mondoe (heelagter), Gary Olckers (vaskopstut), Cresswille Kiewiet (plaasvervanger-losskakel en Renaldo Hartnick (skrumskakel, 2) gaan druk. Reagan Pienaar (losskakel) slaag met 'n doelskop en 'n strafdoel en Kiewiet het ook 'n doelskop oorgeklits. Devon Holland (flank) is aangewys as speler van die wedstryd.
Crusaders het op die Parkdene-sportterrein vir Groot-Brakrivier met 23-10 verras. Maxolo Kiewiets (flank) en Bongani Ngoma (agtsteman, 2) is oor vir drieë vir die wenspan. Bobo Pijane (skrumskakel) slaag met 'n doelskop en 2 strafdoele.
Blanco het vir die Silver Stars op sy tuisveld in 'n klipharde wedstryd met 20-18 getroef. Die wenspan se groot held was Hentzwill Pedro (regtervleuel) wat 2 pragdrieë gedruk het. Pedro is vir sy puik spel aangewys as speler van die wedstryd. Darryl van Rooyen (vaskopstut) het Blanco se ander drie gedruk. Henry Wolhuter (losskakel) slaag met 'n doelskop en 'n strafdoel.
Bridgton het op hul tuisveld 6 pragdrieë gedruk in hul oortuigende oorwinning van 42-22 oor die studente van NMMU. Bridgton is nou in die sesde posisie op die punteleer met 18 punte en 'n punteverskil van -13.
Charlie Ewerts (linkervleuel, 2) Neal Daniels (regtervleuel), Anver Venter (heelagter), Rhupino Plaatjies (binnesenter) en Bradwin Wanies (plaasvervanger-losskakel) het vir die wenspan gaan druk. Venter slaag ook met 'n doelskop en 'n strafdoel en Plaatjies het 2 doelskoppe en 'n skepdoel oorgeklits.
Vir die studente is Francois Kemp (agtsteman en kaptein, 2) en Nathan Gogela (plaasvervanger haker) oor vir drieë. Christian Willemse (losskakel) slaag met 2 doelskoppe en 'n strafdoel.
Bridgton se tweede en derde spanne het ook met 27-22 en 34-0 gewen.
Ryno Reyneveld (buitesenter), Grahame September (skrumskakel) en Ruahl Lewis (slot) het vir die wenspan se tweede span gaan druk. Brian Jonathan (heelagter) slaag met 3 doelskoppe en 'n strafdoel.
Vir Bridgton se derde span is Chrizano Julius (regtervleuel), Wilfred Ntlanganiso (flank), Jonathan Meyer (slot),Keith Meyer (vaskopstut), Roswin van Hansen (plaasvervanger-stut) en Vaughan Lucas (plaasvervanger-losskakel) oor vir drieë. Lucas slaag ook met 2 doelskoppe.
'n Drie vir Progress! Foto's: Hugo Redelinghuys.
Ander uitslae:
Die uitslae ná die afgelope naweek se klubrugby in die SWD Premierliga is:
Eerste spanne:
NMMU 22, Blanco 17; Evergreens 26, Progress 22; Bridgton 42, NMMU 22; Barbarians 23, Swellendam 6; Blanco 20, Silver Stars 18; Crusaders 23, Groot-Brakrivier 10.
Tweede spanne:
Blanco 14, NMMU 10; Evergreens 17, Progress 0; Bridgton 27, NMMU 22; Barbarians 38, Swellendam 8; Silver Stars 18, Blanco 15; Groot-Brakrivier 19, Crusaders 11.
Derde spanne:
Blanco 22, NMMU 3; Evergreens 13, Progress 3; Bridgton 34, NMMU 0; Barbarians 32, Swellendam 16; Blanco 13, Silver Stars 5; Groot-Brakrivier 15, Crusaders 0.
Die klubrugbyprogram in die SWD Premierliga vir Saterdag 14 Mei is (tuisspan eerste):
Crusaders t Silver Stars;
NMMU t Evergreens;
Barbarians t Bridgton;
Blanco t Swellendam;
Progress t Groot-Brakrivier.
Crusaders t Silver Stars;
NMMU t Evergreens;
Barbarians t Bridgton;
Blanco t Swellendam;
Progress t Groot-Brakrivier.
ARTIKEL: ANDRé STANDER, GEORGE HERALD KORRESPONDENT
'Ons bring jou die nuutste George, Tuinroete nuus'
