SUID-KAAP NUUSFLITS - Drie verdagtes, onder meer een van die Suid-Kaap, is buite Grahamstad in hegtenis geneem in verband met die smokkel van renosterhoring.
Een van die mans, Forget Ndlovu (40), is ‘n veldgids van die Gondwana Wildreservaat naby Herbertsdale, wat tans deur sy werkgewer geskors is en op Pacaltsdorp woon. Die ander twee is Jabulani Ndlovu (38) van Port Elizabeth, en Sikhumbuzo Ndlovu (37) van Motherwell in die Oos-Kaap. Die mans is nie verwant nie.
Die arrestasies volg nadat kenners in die veldtog teen renosterstroping gewaarsku het dat die skerp styging van stropery in die Oos-Kaap waarskynlik toegeskryf kan word aan die opgeskerpte sekuriteitsmaatreëls in die Kruger Nasionale Park, wat stropers na ander provinsies dwing.
Sedert Januarie is 18 renosters volgens berigte of geskiet, of verdoof, op Oos-Kaap reserwes.
Die drie mans het gister vlugtig in die landdroshof op Grahamstad verskyn in verband met die mees onlangse stropery op die Bucklands Private Wildreservaat buite die stad, nadat hulle verlede Vrydag gearresteer is.
Polisiewoordvoerder kol Sibongile Soci het aan Oos-Kaapse media gesê die verdagtes het vermoedelik die renosterhoring ter waarde van R1,2-miljoen, wat in hul besit gevind is, gestroop van 'n dier wat enkele ure voor hul arrestasie gedood is.
Meer inligting volg soos dit bekend word.
'Ons bring jou die nuutste Tuinroete, Klein Karoo, Hessequa nuus'
