GEORGE NUUS & VIDEO - 'n Groep plaaswerkers wat tans op 'n Geelhoutboom-plaas in die landelike gebied Geelhoutboom woon, kan môre (Vrydag 4 November) hul intrek in nuwe woonstrukture neem.
Die minister van menslike nedersettings, Bonginkozi Madikizela, en 'n span verteenwoordigers van dié departement, personeel van Eskom en plaaslike politici het die amptelike oorhandiging verlede Vrydag bygewoon.
Die lot van plaaswerkers in die Wes-Kaapse wynlande en die omstandighede waarin van hulle woon geniet tans internasionale aandag, nadat 'n omstrede rolprent van 'n Deense ondersoekende joernalis onlangs in Skandinawië uitgesaai is.
Die rolprent handel oor die werksomstandighede op Suid-Afrikaanse wynplase (sien die lokprent by http://www.bittergrapes.net/trailer/).
Madikizela het by navraag die manier waarop sommige plaaswerkers hanteer word veroordeel. "Hulle behoort dieselfde voordele as ander landsburgers te geniet," het hy gesê.
Tydens sy besoek aan die gebied in Februarie vanjaar het die lewensomstandighede van die 29 huishoudings in Geelhoutboom hom ontstel. "Ek wou graag iets doen om te help, my hart was baie seer," het hy gesê. Die gesinne woon reeds vir dekades op die grond - sommige so lank as 70 jaar.
Madikizela het gesê dat sy departement in die toekoms hande wil vat met die nuwe grondeienaars en kyk vir 'n meer permanente oplossing. Tans behoort die grond nog aan Geelhoutboom Estates, maar die Van Greunen-boerdery is in die proses om die grond te koop.
'n Woordvoerder vir die boerdery, Nelius van Greunen, het aan die George Herald gesê dat die mense histories op die grond gevestig is. "Baie van hulle werk nie, of het gestremdhede. Sommige werk elders in die omgewing. Ons het 'n uitnodiging aan hulle gerig om by ons aansoek te doen vir werk," het hy gesê.
"Omdat die grond relatief onaktief was, het die mense ekonomies ook daaronder gely. Ons tree met die grootste deernis teenoor hulle op. Hierdie strukture is 'n interim oplossing."
Volgens Van Greunen het hul boerdery betrokke geraak in gesprekke tussen die huidige eienaars en die owerhede ten einde die lewenskwaliteit van die mense op die eiendom te verbeter. "Die inwoners het intussen aansoek gedoen om behuising en is tans op die behuisingswaglys met die hulp van die munisipaliteit en provinsiale regering," het hy gesê.
Wyksraadslid Gerrit Pretorius praat met lof oor die Van Greunens. "Hulle ingesteldheid is werklik ongelooflik, hulle probeer die werkers sover moontlik akkommodeer," het hy gesê.
Madikizela het aan die begunstigdes verduidelik dat die departement tans nie huise kan bou nie, omdat die werkers op privaat grond woon.
"Die strukture is nie die ideaal nie, maar darem 'n verbetering van julle huidige lewensomstandighede," het hy gesê.
"Dit is net die begin." George-munisipaliteit, die Wes-Kaapse departement van behuising en Eskom het die projek saam aangepak. Tans is 58 huishoudings op die grond gevestig. Eskom is in die proses om vir almal elektrisiteit te voorsien."
Kyk na 'n video hieronder
Die toestand van Malan se huidige huis het oë laat rek. Van links is die wyksraadslid Gerrit Pretorius, raadslid Edmund Bussack, minister van menslike nedersettings, Bonginkozi Madikizela en ‘n verteenwoordiger van Eskom, Athena Makan.
Wyksraadslid Gerrit Pretorius voor een van die nuwe strukture. Altesaam 29 gesinne gaan volgende Vrydag (4 November) na so ‘n struktuur verhuis. Foto’s: Michelle Pienaar.
ARTIKEL, VIDEO EN FOTO'S: MICHELLE PIENAAR, GEORGE HERALD-JOERNALIS
'Ons bring jou die nuutste George, Tuinroete nuus'
