GEORGE NUUS - Die familie wat 300 hektaar se grond rondom Voëlklip by Heroldsbaai gekoop het om dit in ’n natuurreservaat te omskep, se eerlike en uitsluitlike visie is die rehabilitasie en bewaring van die gebied vir toekomstige geslagte.
George Herald het onlangs berig dat Fynbos Eiendomme, ’n maatskappy van ’n Stellenbosse familie, die grond bekom het vir hierdie doel. Jan Vreken, die familie se spreekbuis en uitvoerende hoof van die maatskappy, het geantwoord op mense wat skepties staan teenoor die aankondiging.
Hy sê die familie het diep wortels in die Tuinroete. Hulle het in die laat tagtigs begin om hul vakansies in Heroldsbaai deur te bring.
“Soos baie mense wat grootgeword het met vakansies in Heroldsbaai, het ons geslagte se herinneringe wat aan hierdie kuslyn gekoppel is - om in die heuwels rond te klouter, die fynbos te verken en lang somervakansies hier deur te bring. Daardie verbintenis is waar ons liefde vir die natuur vandaan kom.”
Dit was oor die jare niks ongewoon vir familielede om in te spring en self uitheemse bosse te gaan uitkap nie, vertel hy. “Daar het reeds baie van ons sweet op die grond geval nog lank voor ons dit gekoop het, maar die reservaat gaan nie oor ons nie. Dit gaan werklik net oor die bewaring van ’n baie spesiale landskap met geweldige ekologiese en maatskaplike belang. Toe die geleentheid hom voordoen om dit te koop, het ons besef ons sou aktief moes bewaar om die agteruitgang te stuit.”
’n Verwelkomende naambord.
Benewens uitheemse indringerplante, wat brandrisiko verhoog, is daar ook skade wat deur mense aangerig word. “Ons kon nie net toekyk en stilbly terwyl die verwoesting onder almal se neuse plaasvind nie. Ons móés iets doen. Die begeerte om ’n reservaat te skep, het uit hierdie bewustheid en gevoel vir verantwoordelikheid ontstaan.”
Die reservaat word nie as ’n privaat ontspanningsruimte ontwikkel nie. “Die visie is ’n beskermde natuurlike landskap waar die gemeenskap kan stap, leer en die Kaapse bommeryk kan waardeer, en waar die familie en die gemeenskap help met opruimingsprojekte en die verwydering van indringerplante,” sê Vreken.
’n Omvattende omgewingsbestuursplan en geïntegreerde plan vir die bestuur van indringerplante is saam met bewaringkundiges van die Wilderness Foundation Africa ontwikkel. Die plan is in fases gestruktureer.
Die eerste fase fokus sterk op die verwydering van digte indringerplante, veral akasia en rooikrans, wat groot risiko’s inhou vir biodiversiteit en brandveiligheid. Dit skep ook ruimte vir die fynbos om natuurlik te herstel.
Die pragtige landskap wat die reservaat geïnspireer het.
“Die tweede fase behels die herstel van ekologiese korridors en duinstelsels, en stabilisering van voorheen gedegradeerde gebiede. Terselfdertyd implementeer ons behoorlik beplande brandbane en strategieë om brandbare materiaal te verminder, wat beide die reservaat en die omliggende woonbuurte veiliger maak. Brand is ’n natuurlike deel van die fynbossiklus, maar onbeheerde brandrisiko is nie en ons benadering herstel die nodige balans,” sê Vreken.
Alle werk word uitgevoer in ooreenstemming met Suid-Afrika se omgewingsregulasies. Vreken sê hulle is reeds in gesprek met die relevante owerhede soos CapeNature om langtermynerkenning van die reservaat te verseker.
“Dis ’n langtermynverbintenis wat gebou is op deursigtigheid, vennootskap met die gemeenskap en ’n oortuiging dat Heroldsbaai ’n beskermde natuurlike ruimte verdien wat die skoonheid en ekologiese betekenis van hierdie kuslyn weerspieël. ’n Plek waar inwoners, besoekers, families en toekomstige generasies steeds die natuurlike erfenis kan geniet wat soveel vir ons beteken het.”
• Bedreigde Garden Route Granite Fynbos en Groot-Brak-duinstrandveld kom hier voor. Meer as 75% van die reservaat bestaan uit kritieke biodiversiteitsgebiede (CBA1 en CBA2).
Plek-plek is daar onwettige paaie gemaak waar voertuie ry en mense hulle vullis agterlaat.
IMUST - Mense stort ook bourommel. Hierdie hopie bevat asbes.
‘We bring you the latest Garden Route, Hessequa, Karoo news’
