GEORGE NUUS - Die polisie het vandag bevestig dat die geregtelike doodsondersoek na die dood van Shadine Dantile (29) vroeër die week na ’n moorddossier verander is. Dit kom na die polisie die uitslae van die voorlopige lykskouing ontvang het.

George Herald het op 25 November ’n navraag aan die polisie gestuur nadat verskeie inwoners die koerant gekontak het oor hulle ongelukkigheid met die vordering in die saak. Die publiek was bekommerd oor die rede waarom die polisie aanvanklik ’n dossier vir ’n geregtelike doodsondersoek geopen het, ondanks sterk aanduidings dat sy vermoor is.

Sers. Chris Spies, Suid-Kaapse polisiewoordvoerder, het bevestig dat hulle 'n moordklag ondersoek. 

“Die ondersoek duur voort. Die toneel is gefynkam deur misdaadtoneelkenners en bewysstukke waarop beslag gelê is, is gestuur vir ontleding. Alle leidrade word tans opgevolg,” het Spies gesê.

Geen arrestasies is nog gemaak nie.

’n Nabye familievriend van Dantile, wat na haar begrafnis vertroulik met die koerant gepraat het, het gesê daar was vingermerke aan haar nek en blou merke op haar liggaam. Haar een oog was glo ook geswel en blou. “Mens hoor niks oor enige vordering in die saak nie, die polisie is net nêrens nie,” het die familievriend toe gesê.

Dantile is op Maandag 17 November dood in haar woning in Adamstraat, Rosedale, aangetref. Haar werkgewer, EasyCare in George, het bevestig dat sy as tegnikus in die beroepsafdeling gewerk het.

Kollegas het op die oggend van die voorval bekommerd geraak toe sy nie by die werk verskyn het nie. Nadat hulle haar herhaaldelik sonder sukses per telefoon en per boodskap probeer bereik het, het twee kollegas na haar huis gery om ondersoek in te stel. Hulle het geklop en geroep, maar geen reaksie ontvang nie.

Bure het hulle vertel dat hulle haar laas op Saterdag 15 November gesien het. Die kollegas het ook die hospitaal besoek om te vra of sy dalk opgeneem is. Toe hulle werk toe terugkeer, het ’n vriend van Dantile hulle ingelig dat sy dood in haar huis aangetref is.

Pacaltsdorp-polisielede is omstreeks 08:40 na die huis ontbied nadat bure die ontdekking gemaak het. Beamptes het haar liggaam in die huis gevind en paramedici het haar later dood verklaar.

Dantile se lewe is tydens ’n kersliggedenkdiens op 21 November gevier.

Shadine Dantile se lewe is tydens ’n kersliggedenkdiens op 21 November gevier. Sy is die volgende dag begrawe.

‘Ons bring jou die nuutste Tuinroete, Hessequa, Karoo nuus’