Vroue stop bouery in Proteapark

GEORGE NUUS & VIDEO - 'n Jong ma van twee kleuters is een van sowat 50 vroue in Proteapark wat bitter graag wil help met die bouprojek in hul buurt.

Abigail Boland (24) is fyn en klein en 'n mens kan haar maklik vir 'n tiener misgis. Sy is egter bereid om met haar eenjarige dogtertjie Michaela op die rug, en haar driejarige seuntjie Kawin, bakstene te pak, sement te meng en enigiets te doen vir 'n inkomste.

Boland is een van die vele werkloses wat gisteroggend (Donderdag 8 September) op die bouperseel by die behuisingsprojek in Protea-plakkerskamp opgedaag het. Konfrontasie tussen die boukontrakteur en die inwoners het veroorsaak dat die bouspan besluit het om op te pak. Met die George Mini se aankoms het die laaste werkers hulle kruiwaens en bougereedskap weggestoot.

Die kontrakteur was nêrens te sien nie. Navrae oor hierdie kwessie is aan George-munisipaliteit gestuur, maar hulle kon nie voor druktyd reageer nie.

Gift Mkuzo, 'n gemeenskapsleier van Proteapark, het met die werklose inwoners gepraat en hul gemoedere kalmeer.
Hy het hulle gevra om, indien hulle vir die projek gekies word, hulle goed te gedra en hom nie in die steek te laat nie.

Mkuzo het gesê dat dit die munisipaliteit se plig is om te help om die werkloosheid in areas soos Proteapark te verlig.

By navraag of die vrouens sal kan messelwerk doen, het hy gesê: "Hulle moet sommer ook opgelei word sodat hulle kan bakstene pak. Dit is mos al hoe ons mense vorentoe kan kom."

Vorige klagtes oor die projek sluit in die aanstelling van 'n Gautengse boukontrakteur, Moreki Solutions, en die keuse van begunstigdes vir die huise. Die gemeenskap het sowat drie maande gelede 'n protesoptog na George-munisipaliteit gehou om hul griewe te lug.

Klik hier vir 'n fotogalery.

Kyk 'n video hieronder.