SUID-KAAP NUUS - Progress het Saterdagmiddag sy posisie verstewig op die punteleer in die SWD Premierliga met sy oorwinning van 20-12 oor Silver Stars op die Rosemoor-sportterrein.
Die groot skare mense is getrakteer op aanskoulike hardlooprugby deur beide spanne.
Die skeidsregter, Francois Davids, het in die eerste helfte vir Jan Mowers (flank) en Dillon Kerspuy (skrumskakel) van Silver Stars, en net na rustyd vir Richard Voorslag (slot) van Progress, met geelkaarte van die veld gestuur.
Silver Stars het groot terugslae gehad toe hul voorste puntemaker met die skoen, Neillin Scott (heelagter) in die 15de minuut van die eerste helfte die veld moes verlaat het weens 'n skouerbesering. Hul spoedvraat Virgil Gysman (regtervleuel) se wedstryd is kortgeknip na 'n enkelbesering.
Vir die wenspan het Brianston Booysen (haker) en Wendell Pondo (agtsteman) voorlangs die vonk verskaf met hul aggressiewe dryfwerk en puik verdediging.
Agterlangs was Jade Roelfse (losskakel) hul groot generaal. Sy taktiese skopwerk het baie druk op Stars geplaas. In die middelveld het hul senterpaar Creswin Josephs en Werner Jacobs uitgeblink. Veral Jacobs, wat aangewys is as speler van die wedstryd. Hul agterste driehoek, Henry Wolhuter (heelagter), vleuels, Fizel Fredericks en Chumani Kema was gevaarlik met die bal in die hand.
Silver Stars se ysters voorlangs was Everton Zondagh (loskopstut), Elgin Joseph (haker), slotpaar, Werner Klaassen en Franklin James en Edwin Lottering (agtsteman).
Stars se skakelpaar Dillon Kerspuy (skrumskakel), Ashwill Scott (losskakel) en senterpaar, Cheslin Jafta en Marshall Boesak se spoed en balvaardighede het die groot skare op hul voete gehad.
Vir die wenspan is Mzo Dyantyi (skrumskakel), Fizel Fredericks (regtervleuel) en Richard Voorslag (slot) oor vir drieë. Jade Roelfse (losskakel) slaag met 'n doelskop en 'n strafdoel.
Cheslin Jafta (binnesenter) en Marshall Boesak (buitesenter) het vir Silver Stars gaan druk. Ashwill Scott (losskakel) slaag met 'n doelskop.
Fielies het met 4 strafdoele geslaag in hul naelbytsege van 12-10 oor die studente.
Die tuisspan se drieë is deur Ashton Goslin (linkervleuel) en Francois Kemp (agtsteman) gedruk.
Die verdedigende kampioen Evergreens het op die Pacaltsdorp-sportterrein vir Groot-Brakrivier oortuigend met 56-33 geklop. Rustyd was die wenspan reeds met 30-26 voor gewees.
Dit was 'n baie gelykop wedstryd in die eerste helfte, maar na rustyd het Evergreens die krane begin opdraai en 7 pragdrieë gedruk. Groot-Brakrivier het self 5 drieë gedruk.
Voorlangs het die tuisspan die oorhand begin kry en vir hul agterlyn genoeg balbesit gegee om te baljaar. Veral hul slot Marvin November, Buran Parks (agtsteman en kaptein), Raffie Wesso (flank) het voorlangs 'n barshou gespeel.
Agterlangs het Erwin Harris (losskakel) die spel goed dikteer en met taktiese skoppe baie druk op die besoekers geplaas. Divandre Strydom (senter), Shaun Booysen (regtervleuel) en Linden Rhode (heelagter) het beïndruk.
Vir Evergreens is Linden Rhode, Shaun Booysen, Divandre Strydom (2) Buran Parks, Julian Prins en Logan Hendricks oor vir drieë. Erwin Harris slaag met 2 doelskoppe en drie strafdoele en Jason Horn het 4 doelskoppe oorgeklits.
Hyron Erasmus (linkervleuel), Ricardo van Wyk (losskakel), Ronwin Agent (skrumskakel), Grant Pockpass (agtsteman) en Anwar Ohlson (plaasvervanger flank) het vir die besoekers gaan druk. Henlinn Botha (buitesenter) en Ricardo van Wyk (losskakel) slaag elk met 'n doelskop.
Barbarians het 6 drieë gedruk in hul oorwinning van 31-44 oor Maori's op hul tuisveld.
Kervin Taute (regtervleuel), Marshall Daniels (buitesenter), Macdilen Saayman (losskakel), Ralton October (skrumskakel), Winston Seconds (agtsteman) en Hendrik Kriek (loskopstut) het vir die wenspan gaan druk. Saayman slaag ook met 4 doelskoppe en 2 strafdoele.
Progress II (13). Drie: Duran Josephs (agtsteman). Brislin Blom (buitesenter) slaag met 'n doelskop en 2 strafdoele.
Silver Stars II (9): Jermaine October (losskakel) slaag met 2 strafdoele en Henwico Stal (skrumskakel) klits 'n strafdoel oor.
Progress III (16): Drieë - Devon Lindoor (flank), Bramville Williams (slot). Eugene Heneke (losskakel) slaag met 2 strafdoele.
Barbarians II (31): Drieë - Curtley Kiewiet (2), Chester Mitchell, strafdrie. Teswin Sampson slaag met 3 strafdoele.
Maori's II (0).
Barbarians III (27): Drieë - Leeroy Muller (3). Clinton Seconds, Xavien Plaatjies. Leolan Mondoe slaag met 'n doelskop.
Maori's III (17).
Crusaders II (29): Drieë - Marshall Kleinbooi (3), Shane-Lee Rollison. Geraldo Pietersen slaag met 2 doelskoppe en 'n strafdoel.
Crusaders III (64): Drieë - William Frans, Bernito Bostander, Ricardo Frans, Wesley Manuel (2), Eldrid Salman, Jacob Saulse, Ron October, Winnedyne Phillips, Keanan Borchards. Frans slaag ook met 4 doelskoppe en Darren Moos het 3 doelskoppe oorgeklits.
Evergreens II (15): Drieë - Nathan Beukman, Ru-waan Bredenkamp. Quinton Africa slaag met 'n doelskop en 'n strafdoel.
Groot-Brakrivier II (14): Drie - Byrol Stuurman. Deavan Carelse slaag met 3 strafdoele.
Groot-Brakrivier III (17): Drieë - Hugh Minnies (buitesenter, 3). Reduaan Botha (heelagter) slaag met 2 doelskoppe en 'n strafdoel.
Evergreens III (13): Drieë - Alvin Godfrey, Dillon Fillies Jonathan Saayman slaag met 'n strafdoel.
'Ons bring jou die nuutste Tuinroete, Klein Karoo, Hessequa nuus'
