TUINROETE NETBAL NUUS - Die 2023 Netbal-wêreldbekertoernooi word in Kaapstad aangebied. Dit is die eerste keer dat die toernooi in Afrika gehou sal word en volg op verskeie ander, baie suksesvolle wêreldbekerbyeenkomste wat in die verlede in Suid-Afrika aangebied is.
Groot infrastruktuurontwikkeling het veral die wêreldbekerrugby, die wêreld-bekersokkertoernooi en die wêreldbeker-kriekettoernooi voorafgegaan.
Die land het egter ook die wêreldbeker-toernooi vir vroue (2005) en die A1 GP-wêreldbeker van Motorsport (2006) aangebied, 'n prestasie wat weinig ander lande ter wêreld Suid-Afrika kan nadoen.
In afwagting op die Netbal-wêreldbeker-toernooi in 2023, word infrastruktuur regoor die Wes-Kaap ontwikkel en beide Mosselbaai-munisipaliteit en George-munisipaliteit het vandeesweek ruim voordeel getrek uit befondsing wat deur die Wes-Kaapse regering se departement kultuursake en sport bewillig is.
Netbalbane in die distrik sal opgegradeer of nuut aangebou word om te voorsien in toekomstige streek-, nasionale, selfs internasionale toernooie wat in die vooruitsig gestel word.
Die Wes-Kaapse LUR vir kultuursake en sport, minister Anroux Marais, het die onderskeie netbalspanne van die SWD en spesifiek atlete van Groot-Brakrivier, aangemoedig om nou reeds te begin met voorbereiding vir die 2023-wêreldbekernetbaltoernooi. Na verwagting mag van die wegwedstryde en voorbereidings vir die toernooi in die Eden-distrik plaasvind.
Die Wes-Kaapse LUR vir kultuursake en sport, minister Anroux Marais, het ook geld bewillig aan die George-munisipaliteit wat deur die uitvoerende burgemeester, Leon van Wyk, ontvang is.
Voorsitter van die Eden-netbalfederasie, René Booysen, het atlete herinner aan die voordele van georganiseerde sport vir die groter gemeenskap. Sy beklemtoon die voordele wat spanwerk, dissipline, toewyding en respek, alles kenmerke van spansport, vir die groter gemeenskap meebring.
Enige atleet wat sukses in die sportsoort van sy keuse bereik, slaag dikwels ook op ander fasette omdat sport die grondslag vir deursettingsvermoë en 'n wenkultuur gelê het.
Minister Marais het die jeug en veral jong meisies aangemoedig om by sport betrokke te raak.
"Sport bied geleenthede en uitdagings. Die gemeenskap moet hul jongmense aangemoedig om netbal te speel om voordeel te kan trek uit die talle geleenthede wat dié en ander sport meebring."
Die minister en haar personeel het ook die geleentheid benut om besoek te bring aan die area waar 'n nuwe sokkerveld vir Groot-Brakrivier gebou word.
Die spelreëls vir netbal is in isiXhosa vertaal en kopië van die reëlboekie is aan die voorsitter van die Eden Netbalfederasie René Booysen, deur minister Anroux Marais oorhandig.
'Ons bring jou die nuutste George, Tuinroete nuus'
