SUID-KAAP NUUS - Nominasies vir die jaarlikse glansgeleentheid, die Eden-sportraadtoekennings, sluit vandag Saterdag 24 Junie. Die toekenningsaand vind plaas op Donderdagaand 27 Julie.
Die Eden-distrikmunisipaliteit (Eden DM) het aangekondig dat hulle 'n amptelike vennoot word in die aanbieding van die Eden-sporttoekennings. "Dit strook met die posisie wat Eden DM in die plaaslike regeringstruktuur beklee en die geo-politieke afbakening van die Eden-streekraad," sê die uitvoerende burgemeester, Memory Booysen.
Die Hessequa-munisipaliteit op Riversdal speel vanjaar gasheer vir die spoggeleentheid vir Eden-sportlui. Die Wes-Kaapse departement van kultuursake en sport (DKES) is saam met die Eden-sportraad die ankervennote vir die toekennings. Die spoggeleentheid vind nou op 27 Julie plaas.
Hierdie skuif is die gevolg van die nasionale departement van sport en rekreasie se Suid-Afrikaanse sporttoekennings wat nou op 12 November plaasvind.
Volgens Dave van der Walt, sekretaris van die Eden-sportraad, is dit ook die rede waarom daar nie in 2016 'n Wes-Kaapse funksie was nie.
Die amptelike uitnodigingsvorms is reeds na alle sportfederasies, munisipale sportrade en skole uitgestuur.
Rolspelers word versoek om by ontvangs van die nominasievorms dit te voltooi en voor 24 Junie aan Dirk van der Westhuizen (DKES) en Dave van der Walt (Eden-sportraad) terug te stuur.
Alle Eden-sportfederasies word genooi om hul topsportpersone, afrigters en administrateurs te nomineer. Verlede jaar is 'n rekordgetal van 193 nominasies ontvang.
Daar is 32 kategorieë waarin meegeding word. Alle federasies wat finansiering van DKES ontvang het, moet volgens 'n ooreenkoms persone nomineer. Die publiek kan ook nomineer, maar alle nominasies moet op die voorgeskrewe nominasievorm gedoen word en deur die rele-vante Eden-sportfederasie goedgekeur word.
Nominasievorms kan by die Van der Walt, by sportcouncil.eden@gmail.com gekry word. Sportprestasies tussen 1 September 2016 en 24 Junie 2017 word in ag geneem. Die wenners van die kategorieë wat in ooreenstemming is met dié van die Wes-Kaap word outomatiese finaliste vir die Wes-Kaapsporttoekennings.
Eden spog met 'n trotse rekord oor die afgelope jare met van sy sportlui wat as Wes-Kaapse wenners bekroon is.
Hierdie wenners sluit in:
SWD-krieket (federasie van die jaar), Blaine Dodds (sportman), Corné Bence (administrateur), Bianca Buitendach (sportvrou), Shanigue Loggenberg (junior sportvrou), Anél Oosthuizen (junior sportvrou), Henry Rhoode (vrywilliger), Immiraan Malgas (inheemse sport), Oudts-hoorn Vaardigheidskool (ontwikkelende skool), Georgou Divaris (skole sportman), Trevor Davis (ministeriële toekenning), Lee Arries ministeriële toekenning), André Stander (joernalis), Jordan Duminy (skole sportman), Jessica Gerber (junior sportvrou), Hoër Landbouskool Oakdale (skole sportspan), Lee-Ann Pace (sportvrou).
1. Administrateur van die jaar
2. Afrigter van die jaar
3. Plaaswerker sportpersoon van die jaar
4. Nuweling van die jaar
5. Erkenning van tegniese uitnemendheid
6. Federasie van die jaar
7. Span van die jaar
8. Inheemse sport span van die jaar
9. Laerskole sportman van die jaar (veelsydigheid)
10. Laerskole sportvrou van die jaar (veelsydigheid)
11. Hoërskole sportman van die jaar
12. Hoërskole sportvrou van die jaar
13. Sportvrou met 'n gestremdheid van die jaar
14. Sportman met 'n gestremdheid van die jaar
15. Riaan Loots toekenning van die jaar (bydrae tot bekamping van geweld in sport)
16. Junior sportvrou van die jaar
17 Junior sportman van die jaar
18. Meester sportvrou van die jaar
19. Meester sportman van die jaar
20. Sportvrou van die jaar
21. Sportman van die jaar
22. Vrywilliger van die jaar
23. Skole sportspan van die jaar
24. Ontwikkelende skool sportspan van die jaar
25. Sport gemeenskapsbouer van die jaar
26. Leeftyd presteerder
27. Legende toekenning
28. Ererol
29. Joernalis van die jaar
30. Fotograaf van die jaar
31. Rekreasie sportliggaam van die jaar
32. Presidentstoekenning
Vir enige verdere inligting bel die voorsitter van die reëlingskomitee, Rudi Claassen, by 083 500 4877 (rudolphclaassen9@gmail.com) of Van der Walt, 082 773 4901 (sportcouncil.eden@gmail.com).
'Ons bring jou die nuutste Tuinroete, Klein Karoo, Hessequa nuus'
