SUID-KAAP NUUS - Die Eden-sportraad is opsoek na 40 kandidate om die titel van sportlegende aan te neem.
Die kandidaat moet die gees van sport omhels en verstaan, en reeds 'n verskil ten opsigte van sport, in hulle gemeenskap gemaak het.
Elke jaar vereer die departement van kultuursake en sport in samewerking met die distriksportrade, die legendes in sport. Die besture van sportfederasies het baie verjong en baie van die legendes is nie meer aan hulle bekend nie.
Dis juis hoekom die Eden-sportraad graag die publiek se hulp wil inroep om hierdie legendes op te spoor.
Om 'n potensiële sportlegende te wees volgens DKES en EDENSR, moet die kandidaat aan die volgende vereistes voldoen:
- moet 'n groot bydrae tot die sport lewer,
- moet as sportikone in hul gemeenskap beskou word, hulle moet alles insit vir hul sport,
- moes voor 1992 'n rol ten opsigte van die groei van sport in Suid-Afrika gespeel het,
- moet 'n leeftyd se diens aan die sport gegee het,
- moet ouer as 55 wees en verkieslik moet die kandidaat al afgetree wees, behalwe in spesiale omstandighede waar sy kwalifikasies uitstaande is.
Alle sportsoorte asook die onderwysberoep kan vanjaar genomineer word. Die sluitingsdatum vir nominasies is 29 Julie en alle nominasies moet deur die betrokke sportfederasies gedoen word.
Alle nominasies sal ook oorweeg word vir die Eden-sporttoekennings in November.
Nominasievorms kan op die EDENSR-webtuiste, www.edensc.co.za, onder EDENSC SPORT AWARDS gevind word.
As u van so 'n legende weet, kontak asseblief sportcouncil.eden@gmail.com met die volgende inligting: sportkode, naam en van, ouderdom, woonadres, tel/selnommer, e-posadres en 'n kort beskrywing van die persoon se prestasies en betrokkenheid.
'Ons bring jou die nuutste Tuinroete, Klein Karoo, Hessequa nuus'
