SUID-KAAP NUUS - Dave van der Walt het sy uittrede as voorsitter van SWD-tweekamp aangekondig.
Hy sal met die Oktober 2017 algemene jaarvergadering (AJV) sy boeke, state en alle dokumentasie wat hy oor die afgelope 26 jaar bygehou het aan die nuutverkose voorsitter oorhandig en kantoor verlaat.
Dis nog onbekend wie na Oktober Van der Walt se skoene sal moet vol staan.
Van der Walt is sedert 1990 voorsitter van SWD-tweekamp. Hy het sy uittrede Saterdagaand 4 Februarie tydens die Highgate Groter Oudtshoorn interprovinsiale tweekampbyeenkoms se prysuitdelingsfunksie aangekondig.
Dit volg na hy op die dag van die tweekamp deur Wes-Kaapse minister van kultuursake en sport, Anroux Marais, asook invloedryke sportleiers en -administrateurs soos regter Chris Jansen (SA tweekamp erepresident), Pierre Jacobs (voorsitter OP-tweekamp), Blackie Swart (SA tweekamp president) Archie Markgraaff, (SA tweekamp erelid) en Oudtshoorn se uitvoerende burgemeester, Colan Sylvester, geloof is vir sy sportadministrasie.
Van der Walt sal egter nie na die Oktober tweekamp AJV verlore wees vir sport nie, aangesien hy sal aanbly as sekretaris van die Eden-sportraad.
In sy SWD-tweekamp loopbaan sedert 1990, was hy ook lid van die SA tweekampvereniging se uitvoerende bestuur (2000-2016), spanbestuurder van SWD-tweekamp na die SA kampioenskappe (1992-2016), organiseerder van die SA kampioenskappe vir 2001 en 2013 op Oudtshoorn, nasionale keurder (2000, 2001, 2002, 2003 en 2005 tot 2016), bestuurder van die SA tweekampspan na Engeland (2002), bestuurder van die SA tweekampspan se binnelandse toer (2006) en organiseerder van die jaarlikse Highgate interprovinsiale tweekampbyeenkoms tussen agt provinsies.
'Ons bring jou die nuutste Oudtshoorn, Klein Karoo nuus'
