GEORGE NUUS - Twee Georgiete het in Desember verlede jaar - op dieselfde dag en onder die mes van dieselfde chirurg - 'n nieroorplanting in die splinternuwe Netcare Christiaan Barnard Memorial-hospitaal ontvang.
Tersia Krüger (58) en Marius Bezuidenhout (48) het mekaar reeds voor die operasie leer ken nadat die chirurg, prof. Elmin Steyn, Tersia ingelig het dat nog 'n inwoner van George vir 'n oorplanting op dieselfde dag geskeduleer is.
Die hospitaal het op 5 Desember sy deure geopen en die twee is die volgende dag geopereer. Hulle het saam-saam aangemeld, was direk ná mekaar op die operasietafel en was getuies van mekaar se herstel tydens hul hospitaalverblyf van 10 dae. So is 'n baie spesiale band gevorm en hulle behou steeds kontak.
Albei se lewens het drasties ná die operasies verander danksy die waagmoed en ruimhartigheid van die twee skenkers. Tersia het 'n nier ontvang van Steve Neumann, die voorman op Adamskraal-plaas in die Baviaanskloof.
Twee jaar gelede, toe Tersia se man, Anton bouwerk op die plaas gedoen het, het hy sy vrou se probleem met polisistiese niere ('n genetiese toestand wat groot siste op die niere veroorsaak) terloops in 'n gesprek opgehaal.
Steve, wat sy linkerbeen jare gelede in 'n motorongeluk verloor het, het dadelik gesê hy sal 'n nier skenk.
As geregistreerde orgaanskenker wou hy vantevore 'n nier aan 'n Joodse man van Amerika skenk, maar om die nier daar te kry, sou dit uiteindelik vir die ontvanger te duur maak. Die grootmoedige boer spot bietjie met homself oor hy nou net een been en een nier het. "Maar die Vader gee lewe, en ek wou ook help om iemand se lewe te spaar," sê Steve, wie se vrou Jeanine hom heelhartig in sy besluit ondersteun het.
Die feit dat sy bloedgroep O-positief is, beteken dat hy aan enigiemand kan skenk, hoewel daar nog ander faktore is wat verenigbaar moet wees met die ontvanger.
Marius het 'n nier van sy vrou, Heiletha gekry. Hulle bloedgroepe is verenigbaar en vir haar was die skenking amper 'n logiese stap. "My motiewe was nie suiwer altruïsties nie. Ons het drie kinders op skool en ek wil hulle nie alleen grootmaak nie," sê sy. Marius was vir twee jaar lank op dialise, wat ook 'n groot ontwrigting in die gesin se lewens veroorsaak het.
Marius se niere is weens erge nierstene beskadig as gevolg van die wanfunksie van sy byskildkliere, wat in 'n aantal operasies voor die nieroorplanting verwyder moes word. Hy moes groot aanpassings maak terwyl hy op dialise was. Hy werk in Mosselbaai en het drie keer per week baie vroeg soggens uit George vertrek om sy dialise (dit duur vier ure) in Mosselbaai voor werk in te pas.
Deesdae is Marius dankbaar om die dramatiese verbetering wat hy ná 'n dialise gevoel het, op 'n permanente basis te ervaar.
Vir Tersia wag daar ook 'n nuwe lewe. Sy vertel, "Ek kon nie meer my arms optel om wasgoed op te hang of goed behoorlik vashou nie, en dit was moeilik om selfs net 'n deurknop te draai. Ek het 'n kort geheue gehad en 'n gewone gesprek was vir my moeilik."
Sy sou twee reëls in 'n boek lees, dan moes sy dit neersit. Dit het ná die operasie handomkeer verander. "Ek kon nie verstaan waarom Marius so baie praat toe hy klaar geopereer is nie," onthou sy die dag van die operasie. Dit was natuurlik omdat hy soveel beter gevoel het, en dit was nie lank nie, toe trek ek ook weg," lag sy. Sy het twee boeke tydens haar verblyf in die hospitaal deurgelees.
"Ek kon ook vir die eerste keer in baie jare proe wat ek eet, iets waaroor ek baie emosioneel was." Anton moet nou keer dat sy skelmpies in die tuin gaan vroetel totdat die dokter alle beperkings op haar aktiwiteite ophef. En haar nuwe lewenslus is alles te danke aan "Stevie", die nier wat na sy skenker vernoem is.
Gereed vir die operasie: Marius en Heiletha Bezuidenhout arriveer by die Christiaan Barnard Memorial-hospitaal.
Nierskenking feite
Twee teaterspanne het die nierooplantings uitgevoer, 'n span wat die niere uit die skenkers moes haal en een wat dit in die ontvangers moes oorplant.
Orgaanskenkers word aan indringende onderhoude en sielkundige toetse onderwerp, veral waar dit nie 'n familielid is wat die orgaan skenk nie.
Omdat 'n nier deesdae endoskopies verwyder word, is die operasie op die skenker minder ingrypend en herstel die persoon taamlik vinnig.
'n Mens se kans om 'n normale lewe te lei met net een nier, is net so goed soos met twee. Wanneer 'n probleem met 'n mens se niere ontwikkel, word albei gewoonlik geaffekteer. 'n Mens kan dus nie redeneer dat jy 'n "spaarnier" moet hou nie.
Die ontvanger het uiteindelik drie niere, maar die nuwe nier neem al die funksies oor.
Die twee skenkers sê hulle voel piekfyn met net een nier, hoewel Heiletha kla van bietjie vogterughouding. Hulle moedig mense aan om te registreer as orgaanskenkers.
ARTIKEL: ALIDA DE BEER, GEORGE HERALD-JOERNALIS
'Ons bring jou die nuutste George, Tuinroete nuus'
