GEORGE NUUS - Lance Roelfse (19), die SWD-krieketspeler wat vier maande gelede in 'n motorongeluk beseer is, het verlede week weer by die krieket-akademie aangesluit en kan met sy krieketloopbaan voortgaan.
Lance se pa, Frank Roelfse, beskryf dit as 'n wonderwerk. "Ons kan nie glo hy het so vinnig herstel nie. Dit is regtig een groot wonderwerk," het Roelfse gesê.
Volgens Roelfse moes Lance vir nog drie maande arbeids- en fisioterapie ondergaan, maar is binne 'n maand geskik verklaar om huis toe te gaan. "Dit is 'n teken daar is altyd hoop, mens moet net bly glo en bid," het Roelfse gesê.
Hy het bygevoeg dat Lance se algemene welstand baie goed is en hy nou weer soos normaal alles vir homself kan doen. Lance beoog ook om volgende maand met sy studies by Unisa voort te gaan.
André du Plessis, die afrigter van die SWD-krieketakademie, het by navraag gesê dat hulle nie te veel druk op Lance wil plaas om op die veld te gaan nie, omdat hy nog skrikkerig is na die ongeluk.
"Ons gaan vir die volgende paar maande sy vordering dophou totdat hy gereed is om te speel," het du Plessis gesê.
Die motorongeluk waarin Lance betrokke was, het op Donderdag 5 Februarie gebeur toe hy op pad was na 'n oefensessie by die SWD-sportterrein op Oudtshoorn.
Hy het kop- en inwendige beserings opgedoen, waarna hy twee breinoperasies ondergaan het. Hy het die dokters verbaas toe hy drie dae later uit sy koma wakker geword en so vinnig na sy operasie herstel het.
Albertus Kennedy, die hoof uitvoerende beampte van SWD-krieket, het voorheen aan die George Herald gesê, dat Lance 'n jong belowende krieketspeler is vir wie daar nog 'n blink toekoms voorlê.
Vorige artikels
- Jong krieketspeler terug op veld na ongeluk
- Beseerde krieketspeler vorder goed
- SWD-krieketspeler se toestand verbeter
ARTIKEL: HENRICA VELDMAN, GEORGE HERALD - JOERNALIS.
'Ons bring jou die nuutste George, Tuinroete nuus'
