GEORGE NUUS & VIDEO - Die hoë voorkoms van misdaad in Pacaltsdorp is Dinsdagaand op 'n vergadering tussen keelvol inwoners en verskeie rolspelers, waaronder die plaaslike polisie, bespreek.
Die departemente van onderwys, maatskaplike ontwikkeling, korrektiewe dienste, plaaslike kerke en munisipale wetstoepassing was ook by die vergadering in die Pacaltsdorp-gemeenskapsaal.
Alhoewel die opkoms vir die vergadering goed was, was dit teleurstellend om te sien dat daar nie meer inwoners die vergadering bygewoon het nie - soos deur een van die bywoners opgemerk is.
Inwoners het veral melding gemaak van dwelmhuise in Pacaltsdorp wie se adresse volgens hulle bekend is aan die polisie.
"Die polisie weet waar die dwelms verkoop word, maar doen min om die plekke uit te roei," het een inwoner gesê.
Nog 'n inwoner het haar bekommernis uitgespreek oor die min polisievoertuie en min lede by die Pacaltsdorp-polisiestasie wat beskikbaar is om die woonbuurt te bedien, swak speurwerk deur die polisie en onopgeloste sake.
"Pacaltsdorp is nie meer so klein soos dit was in die 70's nie, dit het gegroei en daar is nou baie meer mense. Sake word nie opgelos nie, want mens moet heeltyd hoor daar is nie genoeg getuies nie. Mens kry ook nie terugvoering oor jou saak nie," het die inwoner gesê.
Leë oorgroeide erwe, swak beligting in onder andere New Dawn Park en kinders wat bedags in die strate, veral Dellvillepark ronddwaal terwyl hulle in die skool moet wees, is as kwelpunte geopper.
Misdaad begin jonk
Jong kinders se betrokkenheid by misdaad wek ook kommer. 'n Onderwyseres van New Dawn Park Primêr, Ruth Miller, vertel van dwelm- en tikverslawing onder kinders. "Baie van ons kinders is verslaaf aan dagga. Ek het al in skooltyd uitgegaan by die skoolhek dan gaan wys die kinders vir my die huise waar hulle self die dwelms gaan koop.
"Hulle kom gerook skool toe en is nie eens meer skaam om te sê hulle is gerook nie. Wat gaan van New Dawn Park se kinders, die gemeenskap word?
"Ons ouers moet opgevoed word. Ouers is te bang om op te staan vir hul gemeenskap, want hulle word gedreig of omgekoop met kospakkies," sê die opvoeder.
Kyk 'n video hieronder.
Behalwe die kerke, het al die departemente teenwoordig te kenne gegee dat hulle 'n tekort aan personeel en beperkte hulpbronne het.
'n Vraag van die George Herald oor of dié probleme aandag geniet is nie beantwoord nie.
Kol. Petrus Shabalala van die gebiedskantoor het beklemtoon dat inwoners geregtig is op terugvoering oor hul sake.
"Ons het vele uitdagings en probeer die gemeenskap dien tot die beste van ons vermoë met die beskikbare lede en hulpbronne," het hy gesê. Hy beveel aan dat inwoners klagtes by die stasiekommissaris van die betrokke stasie, of by sy kantoor in Plantasiestraat, rapporteer.
Rolspelers hou Saterdag (25 Junie) 'n misdaadberaad buite Pacaltsdorp waartydens die kwessies van Dinsdagaand se vergadering ook bespreek sal word.
'n Datum vir 'n opvolgvergadering met die gemeenskap om terugvoer te gee, sal later bekend gemaak word.
ARTIKEL, VIDEO & FOTO: LIZETTE DA SILVA, GEORGE HERALD-NUUSREDAKTEUR
'Ons bring jou die nuutste George, Tuinroete nuus'
