GEORGE NUUS - Die polisie het vandag ‘n 47-jarige man by Absa in Yorkstraat in hegtenis geneem wat ‘n kliënt se bankkaart by die OTM geneem het, en moontlik wou kloon het.
Volgens inligting het die kliënt drie mans binne die gebou by die OTM’e opgemerk toe hy daar aankom. Hy het na die eerste teller langs die venster gegaan.
Een van die mans, wat netjies geklee was, het hom hulp aangebied en het heeltyd met hom probeer praat terwyl die ander twee mans agter hom gestaan het. Die twee het hard agter hom begin stry en toe hy omkyk het die “behulpsame” verdagte sy kaart uit die teller verwyder en vir hom ‘n ander kaart, wat presies soos sy Absa een gelyk het, aangebied. Hy het onmiddellik gesien dat dit nie sy kaart is nie, want daar was nie ‘n handtekening agterop nie. Hy het die man vasgegryp, waarna die ander twee weggehardloop het.
Hulle het weggery in die rigting van Hiberniastraat in ‘n rooi Toyota Yaris met ‘n GP-registrasienommer.
Die polisie het slegs die kliënt se kaart op die verdagte gevind, maar geen kloonmasjien nie.
Die George Herald verneem die verdagte, wat glo vanaf Plettenbergbaai na Kaapstad onderweg was, is reeds deur die polisie vrygelaat nadat die slagoffer nie ‘n saak wou maak nie.
Dit wil voorkom of daar op daardie stadium nie enige sekerheidswagte aan diens was nie, want die tak het gister gesluit vir opknappingswerk. Kliënte kan van môre af die tak by Yorkstraat 91 (langs Sars) of die een in die Garden Route Mall besoek.
ARTIKEL: LIZETTE DA SILVA, GEORGE HERALD-JOERNALIS
'Ons bring jou die nuutste George, Tuinroete nuus'
