GEORGE NUUS - Minstens vyf plakkershutte is Sondag 19 Januarie vernietig in ’n brand in die Golden Valley-plakkerskamp in Blanco. 

Die brand het omstreeks 23:00 uitgebreek,  wat inwoners gedwing het om hul huise in paniek te verlaat.

Volgens ooggetuies word vermoed dat ’n stoof wat aangelos is, ’n kortsluiting veroorsaak het wat tot die brand gelei het. 

Die brand het ook die kragtoevoer na die Bo-Valley-area onderbreek, aangesien die kragboks beskadig is. Hersteldienste het onmiddellik begin werk om die skade te beperk en kragtoevoer so gou moontlik te herstel.

In die nasleep van die brand het 'n swaar rook- en swawelreuk oor die gebied gehang, terwyl sommige hutte gesmeul het. Hoewel daar geen ernstige beserings aangemeld is nie, het inwoners groot verliese gely, insluitend meubels, kos, en skoolbenodighede.

'n Aflaaipunt en kontaknommer vir donasies moet nog bevestig word. 

'n Navraag is na die munisipaliteit gestuur vir kommentaar en terugvoer word binnekort verwag. 

‘Ons bring jou die nuutste Tuinroete, Hessequa, Karoo nuus’