GEORGE NUUS - Sakkrappers, twee buurtwagte en die polisie het gisteroggend saamgespan in 'n poging om inbrekers vas te trek wat sowat R30 000 by 'n woonstel in Denneoord gebuit het. Die drie booswigte is egter steeds op vrye voet.
'n Lid van die Denneoord-buurtwag, Eugene Rautenbach, wou gisteroggend skuins voor 09:00 sakkrappers in Skuinsstraat wegjaag, toe hulle hom meedeel dat hulle 'n inbraak omstreeks 08:00 aanskou het.
Die krappers het glo die mans sien wegkruip in bosse in 'n tuin en toe naarstiglik gesoek na iemand wat die polisie kon laat weet.
Hulle het omstreeks 08:30 'n vrou van die inbraak vertel, maar toe het die drie inbrekers reeds in 'n wit Opel Corsa weggejaag.
Rautenbach het 'n selfoonfoto van die voertuig met WhatsApp na die Bergsig- en George-Suid-buurtwag gestuur, en 'n beskrywing van die mans gegee.
Hy het die foto van kringtelevisie-materiaal bekom wat die ganse inbraak uitbeeld.
"Op die video kan jy duidelik sien hoe hulle die woonstel se veiligheids-hek se slot afsny en die deur oop skop. Hulle het allerlei elektroniese apparaat soos televisies, kameras, 'n x-boks, en 'n leerbaadjie gesteel," het Rautenbach gesê.
Sowat 'n uur na die inbraak het Bergsig-buurtwag die voertuig raakgesien en agtervolg tot by die Garden Route Mall se parkeerarea. Die verdagtes het ongelukkig snuf in die neus gekry en weggejaag in die rigting van Thembalethu, met Bergsig-buurtwag en die polisie kort op hulle hakke.
Volgens Rautenbach het die diewe die motor in Thembalethu agtergelaat en te voet gevlug. Niks van die gesteelde items is in die voertuig gevind nie. Daar word vermoed dat die booswigte dit reeds voor die jaagtog elders versteek het.
Die polisie ondersoek die moontlikheid dat dit 'n ge-steelde voertuig is, het sers. Riëtte Esterhuyse van George-polisie bevestig.
Enigeen met inligting wat met die ondersoek kan help kan kapt. Kobus Landman kontak by 044 803 4719.
ARTIKEL: MICHELLE PIENAAR, GEORGE HERALD - JOERNALIS
'We bring you the latest George, Garden Route news'
