Queba-moord - 'Alles darem te toevallig'

GEORGE NUUS - Dit kan toeval wees dat Zanemale Laho (32) van Thembalethu op die dag van Tom Queba (47) se moord op 25 Mei 2014 agter hom (Queba) gery het tot by die Garden Route Mall en weer agter hom uit is. Maar dit kan ook wees dat Laho hom agtervolg het, "omdat hy die job moes klaar maak".

Só het advokaat MP Heyns, die staatsaanklaer, dit Maandag aan die moordaangeklaagde, Laho tydens kruisondervraging gestel. Laho het Maandag self in die getuiebank ingeskuif om in sy verhoor te getuig. Hy het erken dat dit sy bussie is wat op beeldmateriaal by die Garden Route Mall gesien word en ook dat hy saam met Queba op die N2-snelweg gery het.

Heyns het gesê, "alles is darem te toevallig". Hy het gesê die persoon met die rooi bostuk wat uit Laho se bussie by die mall geklim het, se optrede is vreemd. Beeldmateriaal wys dieselfde persoon staan by Queba en Laho se bussies agter 'n boom. Dan kan gesien word hoe die twee bussies agter die boom uitbeweeg, maar die persoon met die rooi bostuk word nie weer gesien nie.

Ook ry Laho saam met Queba op die hoofweg en is hy omtrent langs Queba se bussie wanneer hy doodgeskiet word. Queba se selfoon word tydens die moord gesteel en selfoondata wys dat Laho se simkaart sowat 'n uur na die moord in Queba se gesteelde foon ingesit is.

Laho het getuig dat hy dié foon by 'n ander taxibestuurder, ene Ngaba, wat volgens Laho intussen dood is, geleen het.

Heyns het aan Laho gesê dat hy die storie oor Ngaba opgemaak het. Hy het dit aan Laho gestel dat hy nooit sy simkaart in ene Ngaba se foon kon sit nie, want die selfoondata wys dit nie. Heyns wou ook weet hoekom hy 'n selfoon geleen het, terwyl hy sy meisie, Palisa, se werkende selfoon met lugtyd daarop, in sy besit gehad het.

Laho het daardie dag 59 oproepe van sy meisie se foon gemaak.

Dit is ook aan Laho gestel dat hy deel was van 'n komplot om Queba te vermoor. Laho het gesê hy weet niks van enige komplot nie en dat hy geen aandeel gehad het in Queba se moord nie. Regter Roseni Allie en Heyns het Laho verskeie kere tydens kruisondervraging versoek om hul vrae te beantwoord. Regter Allie het vir Laho gewaarsku om nie "speletjies te speel nie" en het gesê dat dit hom (Laho) glad nie help om sekere goed te onthou en ander nie, veral dit wat kort na mekaar gebeur het nie.

Gister het die verdediging Laho se werkgewer, Andile Ndabeni, en sy meisie, Palisa, geroep om te getuig. Die verdediging en die staat sal vandag hul betoë lewer.

Regter Allie word bygestaan deur 'n assessor, ND Kettledas. André Kleynhans verskyn vir Laho.

Nog getuienis in Queba-saak

* Laho het Maandag getuig dat Queba agter hom op die hoofweg gery het. By die voetgangerbrug het Queba verby hom gery. Die volgende oomblik het hy gesien Queba se noodligte en ook sy remligte is aan. Daar was ook ‘n verkeersbeampte op die hoofweg met ‘n kamera.

Hy het gesê Queba het in die vinnige baan gery en hy (Laho) in die stadige baan; en dat hy moes uitswaai nadat dit gelyk het of Queba na sy baan swaai. Hy het toe aangery na Thembalethu. Later het hy weer op die hoofweg gery, op pad na Saasveld met pendelaars en het gesien die pad is afgesper en dat daar baie polisie was.

* 'n Taxibestuurder van Parkdene het vroeër getuig dat hy omtrent dieselfde tyd as Queba en nog 'n wit taxi (Laho) by die Garden Route Mall weggetrek het. Die getuie se bussie word ook op beeldmateriaal van die kringtelevisiekameras gesien. Volgens die taxibestuurder het die taxi van Queba voor gery en die ander wit taxi het saam met hom by die verkeerslig weggetrek.

Al drie taxi's het daarna uit Knysnaweg afgedraai op die N2-snelweg. Die man het getuig hy het stadig gery en gesien dat die twee wit taxi's verder aan langs mekaar in die pad staan waarna die een wit taxi vinnig weggery het.

Klik hier vir vorige artikels:

• Opvolg: Tom Queba-moordsaak

• Binneverhoor moet sê oor vuurwapen

• Verdagte se sim glo na moord in Queba se foon

• Queba glo agtervolg op dag van sy dood

• Opvolg: Tom Queba-moordsaak

• Tom Queba-saak môre voortgesit

• Tom Queba-verhoor begin

• Tom Queba-moordeverhoor begin Maandag

• Tom Queba trail to start in October

• Tom Queba murder case to High Court
• 1 year since Tom Queba's death
• Tom Queba-moordverdagte weer 8 Mei in hof

• Queba accused sentenced for 2011 murder