GEORGE NUUS - Behalwe vir 'n erge verkoue wat hom vyf dae lank platgetrek het, was die Johannesburgse oupa Jakkie van der Colff (72) se fietsrit reg rondom Suid-Afrika se grense sonder teëspoed, en besaai met gul Suid-Afrikaners wat hom sonder uitsondering gasvry ontvang het.
Die George Herald het verlede jaar berig oor Jakkie, 'n hipnoterapeut van Johannesburg, toe hy deur George is op sy avontuur. Hy het by die Kasteel in Kaapstad weggespring en drie maande later weer daar geëindig. Benewens dat dit 'n persoonlike uitdaging was, was sy reis ook bedoel om bewusmaking te skep oor die Instituut vir Blindes se Droomfonds en Ribbons for Roses, 'n organisasie wat mense bystaan wie se kinders kanker het.
Jakkie het op 69 plekke oorgebly en op elke plek het mense hom met ope arms ontvang en slaapplek gegee. "Ek het net twee keer vir 'n gastehuis betaal. Dit was die mense en hulle ongelooflike welwillendheid wat die ondervinding so ongelooflik gemaak het."
Hy het paaie gekruis met interessante storie-vertellers, die metaalkunstenaar Jean Meintjes, 'n Fransman wat al twee jaar lank per fiets toer, en 'n oudpaalspringkampioen. By die Sundown Ranch Hotel anderkant Sun City het die personeel hom ingewag met 'n spesiale liedjie en toejuiging, en op Vredenburg het 'n laerskool spesiaal 'n saalperiode gereël sodat Jakkie die kinders kon toespreek. Hulle het 'n skyfievertoning saamgestel met foto's van sy rit tot op daardie stadium, en R4 000 vir Trap vir Vreugde geskenk.
Voor hy die tog van 5 384 km aangepak het, is Jakkie twee keer in 'n kort tyd met 'n bloeiende
maagseer en depressie gediagnoseer. "Ek was geestelik en liggaamlik by 'n kruispad en ek moes iets doen om daaruit te kom. Baie mense het my afgeraai en ander het geglo ek gaan dit nie maak nie."
"Ek wil ander mense aanmoedig om hulleself uit te daag. Gaan daarvoor en as jy aan jou uitdaging kan voldoen, sal jou lewe verbeter."
Jakkie het dagboek gehou van sy wederva-ringe en sy storie is nou in 'n inspirerende boek, Uitdaging oorwin saamgevat.
Hy het 'n projek begin, Trap vir Lewe, waarby hy fietsryklubs landwyd wil betrek om te probeer wetgewing deurvoer wat fietsryers se veiligheid bevorder. Besoek Trap vir Lewe se Facebook-blad vir meer inligting of bel Jakkie by 083 655 7025.
ARTIKEL: ALIDA DE BEER, GEORGE HERALD-JOERNALIS
'Ons bring jou die nuutste George, Tuinroete nuus'
