GEORGE NUUS - Rowers het kort na middernag vanoggend ‘n OTM binne die Ultra-drankwinkel in Courtneystraat, opgeblaas.
Die bestuurder, Jeandré Bekker, het vanoggend aan die George Herald gesê Msec Sekuriteit het hom na 00:00 gekontak nadat die alarm afgegaan het. Die rowers het ‘n venster gebreek om toegang tot die perseel te kry.
“Met ons aankoms was daar baie rook in die winkel, maar ons het intussen skoongemaak, opgeruim en doen sake soos gewoonlik,” sê Bekker.
Dis onduidelik of die rowers enige kontant uit die Nedbank OTM gebuit het. Hulle het wel met ‘n laai van een van die kasregisters gevlug. Die laai was volgens Bekker leeg.
Niemand is nog in verband met die voorval in hegtenis geneem nie.
Persone met inligting kan die georganiseerde misdaadondersoekeenheid in George skakel by 044 802 1600 of kolonel Jeff van Niekerk by 044 802 1621/082 411 2051.
'Ons bring jou die nuutste George, Tuinroete nuus'
